SC-i WhatsApp nokdangtsü onük magizüker

New Delhi, June 29 (Agencies): Supreme Court (SC)-i WhatsApp nokdangtsü asoshi benokba onük magizüktsü lemtetba ajanga India nung WhatsApp amshir temulung süngzükdaktsüba osang angazükogo.
WhatsApp densema, internet ajanga jet ta osangtsüsang prokshitetba sabangtem ajunga nokdangtsü asoshi Harayana nung alir Right To Information (RTI) temeten asoshi nokdaker kati SC nung Public Interest Litigation (PIL) ken o anogo ishika tejaklen benok saka India nung tentetba tematiba okadaki iba onükji magizüktsü lemteter lir.
“WhatsApp khenyongi nokdangtsü masü saka WhatsApp aser iba mesükba osangtsüsang prokshitsü sabang 20 shi indang miim sapi nungdak dang amshitsü asoshi sorkari bushia aotsü onük benoka liasü,” ta Sudhir Yadav-i osang jangjashitsü.
Paisa ashiba agi, sapiji bushia meyura, sorkari WhatsApp aser iba mesükba sabang ajanga prokshiba osang ka lapoka tenangtsü atema küm jenti agitsü.
Ajisüaka, Yadav aser pai aniba teloki SC masü saka tapet ozüng yanglur bushitsü tetuyuba ka Chief Justice TS Thakur aser Justice AM Khanwilkar na densemba SC okadak mendeni agütsüogo.