SC Jamir-i Odisha Governor nungi anisüngzüker

New Delhi, Metsüremi (March) 20 (Agencies): SC Jamir-i Odisha nung küm pungu kümsük tembanga Governor inyaker Tentonü (Hombar) pai iba menden toktsüogo.
Pa melena Bihar Governor Satya Pal Malik-i Odisha Governor repsema inyaka atatsü atema mapa nungloktsüogo, ta Rashtrapati Bhawan sangdong ka nung metetdaktsü.
Arishi küm 86 tain SC Jamir ya Goa aser Maharashtra nung Governor inyakba sülen Metsüremi (March) 2013 nung Odisha Governor inyaktsü mapa lemzüktsü.
2009 nunga SC Jamir nem Gujarat Governor repsema inyaktsü atema lemzükja liasü.
Punguben tashi Nagaland chief minister inyaksang SC Jamir ya mezüngbo Nagaland nungi Lok Sabha züngsem ka ama inyak. 1961 nungi 1970 tashi pai MP inyak aser iba mapang pai Union Deputy Minister of Railways, Labour & Rehabilitation inyak. 1968 nungi 1970 pai Union Deputy Minister of Community Development & Cooperation, Food and Agriculture inyak aser taoba Prime Minister Jawaharlal Nehru atema Parliamentary Secretary inyaktsü shim.
Tanü SC Jamir-i Governor inyakba anogo tatembangba nung pai Odisha State Assembly nung Budget onük jembi.
SC Jamir melenzüksang arishi küm 72 tain Malik ya taoba mapang Union minister of state for parliamentary affairs & tourism inyak aser Centre o state sorkartem nung tongtipang mapatem inyakogo.
Pa ya kümsük ana atema Rajya Sabha MP ka liasü aser 1989 nungi 1990 tashi Lok Sabha MP inyak. 1974 nungi 1977 tashi Malik ya Uttar Pradesh Assembly nunga MLA inyak.