SC obendang ajanga Congress tangatetba shidak ta kuli sayur: Rahul

New Delhi/Bengaluru, Monupii/May 18 (Agencies): Tanü Supreme Court (SC)-i Karnataka Assembly nung floor test asüng agitsü atema obendang agutsüba sülen Congress party Tir, Rahul Gandhi-i, SC-i obendang agutsübaji ajanga Congress-i Karnataka Angh, Vajubhai Vala-i linük temzüng alema inyak ta jembiba tu shidak ta kuli sayuogo, ta ashi.
“Supreme Court-i obendang agutsübaji ajanga onoki (Congress) Karnataka Angh-i temzüng alema inyakogo ta jembiba tu shidak ta kuli sayuogo. BJP nübo peria meliaka parnoki sorkar akumtsü ta yazü jembi, aser court-i jaogo,” ta Rahul-i ashi.
“Temzüng ajanga anentsüogo, joko parnoki (BJP) sen aser tashiyim amshitsü merangtsü,” ta Rahul-i twitter ajanga metetdaktsü.
Yakünü Karnataka Angh, Vajubhai Vala-i sorkar akumtsü atema BJP jaoka liasü, aser yashinep BS Yeddyurappa Chief Minister inyaktsü atema tenangzükba agiogo, iba denji külemi Angh-i floor test atema anogo 15 agüja liasü, ajisüaka tanü Supreme Court-i asüng (Küptoknü) nikongdang 4:00 ako nung Karnataka Assembly nung floor test agitsü atema obendang agütsüogo.
Bengaluru nunga Congress lenir tain, Ghulam Nabi Azad-i Supreme Court-i temzüng nung ajemdaker obendang agütsüba pelaa agizükogo.
Azad-i, “Angh-i floor test atema Yeddyurappa nem anogo 15 agutsü ajisüaka Supreme Court-i Küptoknü floor test agitsü atema obendang agütsüba ajanga democracy kümzükogo,” ta metetdaktsü.
Karnataka Assembly election agiba sülen BJP-i single-largest party jenjang ngua liasü, saka sorkar akumtsüsa parnoki menden peria mngutet. Ano külen Congress aser Janana Dal-Secular (JD-S) teloktep senteper MLA 117 liasü, ajisüaka state Angh-i sorkar akumtsü atema BJP tama jaoka floor test agitsü atema anogo 15 tashi agüja liasü.