SC obendangji Puducherry nungbo mebenshitettsü: Kiran Bedi

New Delhi, Chiteni/July 05 (Agencies): Centre aser Delhi sorkar na tsüngda tashi raktepba onük nung yashi Supreme Court-i Delhi sorkar pusema obendang agütsüba sülen tanü Puducherry LG, Kiran Bedi-i, Delhi sorkar onük nung SC obendangji Puducherry nungbo mebenshitettsü, kechiyong union territories anaji India linük temzüng kübok Arrla balala kübok lir, ta ashi.
Kiran Bedi-i, Delhi atema linük temzüng kübok Arrla 239AA nung shia lir, saka Puducherry atemabo Arrla 239A nung shia lir, ta metetdaktsü.
“Puducherry ji Delhi den medemdangtsü makok, kechiyong yashi Delhi atema obendang agutsübaji Puducherry nungbo mebenshitettsü,” ta lai Hindi oshi agi twitter ajanga metetdaktsü.
Yashi SC-i, Delhi LG-i telemtetba agitsü atema pa nem nija tashi agüja mali, ajisüaka nüburtemi shimba sorkar den angatettepa inyaktsüla, ta metetdakja liasü.
Delhi Lieutenant Governor (L-G)-i democratic yimya nung nüburtemi shimba sorkari ashiba angatsüla, LG-i pa jurila tashi amshia meinyaktsüla, ta Supreme Court-i obendang agütsübaji Centre sorkari Delhi sorkar yimsüsübaren nung amoshia inyakba aija Aam Aadmi Party (AAP) sorkar metentsüba obendang ka lir.
Taoba mapang nung Puducherry governor aser chief minister, V Narayanasamy na tesendaktep mejungi liasü.
Taküm Monupii/May ita nung Chief Minister-i, Kiran Bedi-i Puducherry nung Congress sorkar indang ‘free rice scheme’ nokdangba atema la aija liasü.
Anogo ishika sülen Chief minister-i, Union sorkari la (Bedi) dak tamang makar anungji lai sodi meshitsüla ta takhangba agüja liasü.
Narayanasamy-i, Union sorkari Bedi-i telemtetba agiba asemben tashi magizük, saka Union sorkari UT Puducherry sorkari agiba telemtetba ang agizüka liasü, ta ashi.