SC tetuyuba nung Karnataka-i TN nem tzü agütsü tenzükogo

Bengaluru, September 13 (Agencies): Karnataka aser Tamil Nadu na tsüngda Cauvery ayongtzü mangatettep ken o adoka nisung asüba, gari aser kiojen jenti raksaba sülen tanü Mongolbar aonung nungi tenzüka Tamil Nadu nem Cauvery ayongtzü agütsütsü,ta Karnataka sorkari metetdaktsü.
Cabinet senden amenba sülen Bengaluru nung osangbenertem den jembidang Karnataka Chief Minister, Siddaramaiah-i, “Onoki temepishiba benokba nung ajemdaker Supreme Court-i temelenshi kar agia tuyuba ama taonung nungi tzü agütsütsü atema Cabinet-i telemtetba agiogo,” ta metetdaktsü.
Chief minister-isa, Tamil Nadu nem tzü agüjaka Bengaluru, Mysuru aser Mandya district tem nung tzü tajemtsü tebilemtsü madoktsü atema inyaktsü, ta nangzük.
“SC-i tuyubatem inyaktsüji tasak, ajisüaka 2017 June 6 nü tashi Cauvery basin aser Bengaluru nüburtem tzü tajemtsü tebilemtsü malitsü atema inyaktsü ta ni nangzüker,” ta Chief minister-isa ashi.
Siddaramaiah-i, “Cauvery ayongtzü ken o nung mapang shia Karnataka nem ochi obendang magütsür. Saka linük indang tongshi asem- Judiciary, administration aser executive den temzüngtem asenoki agizükogo. Temzüng ajanga amenokba sorkari temzüngtemji benshitsü nüngdak. Telemtetba tasak ka süaka asenoki SC tashi mangatsü makok,” ta ashi.
Tamil Nadu dangi tzü talila yoktsü aser anogo timba yoktsü, aser parnok dangi yokba tzü ajak agi cusecs lakh 1.88 jungnüa asütsü, ta paisa metetdaktsü.
September 5, 2016 nü SC-i Karnataka dang, anogoshia Tamil Nadu nem tzü 15,000 cusecs agütsütsü tuyua liasü, iba sülen Karnataka sorkari SC dang temepishiba kar agütsü, ajisüaka SC-i ibaji magizüki Mongolbarnü nungi September 20 tashi Tamil Nadu nem anogoshia tzü 12,000 cusecs agüjang ta tuyuba sülen Hombar nikongdang nungi tenzüka Karnataka nung Bengaluru aser Tamil Nadu nung Chennai na nung longkak aita gari aika rongtoktsü, aser iba ken o nung longkak aitba mapang nisunga ana süogo.