SCAD-i Naga nunger tanur ka angati züngdaktsütsü

Dimapur, Dec.04 (TYO) : Savanna College of Arts & Design (SCAD) nung angati züngdaktsütsü asoshi Nagaland nungi Art & Design nung sempet alirtem rongnung ka shimteta züngdaktsütsü ta alima nung Arts & Design sayudak nüngtugu kaketreju SCAD nung Executive Director ( International Recruitment & Relation), Watsü Maken Imchen Payne-i metetdaktsü.
SCAD ya US nung amenoka lir aser parnok kongsangji Lacoste (France), Atlanta (US) aser Hongkong (Asia) nung lir. Iba kaketrejutem nungji arts aser design maparen nung degree course noklang dak tema agütsür aser tang item angazükertemji kaketshir 1300 dak tali lir. Iba kaketreju nung fashion, architecture, film aser noksa yangluba mapatem tapu noklang dak tema angazüker. Tang tashi nung iba reju nung züngtettertem alima ajaklen tagitsü oset tapu balala design yanglutsür nüngtugu aika lir.
Yasüng Honibar aonung, yangi Maple Tree School, Dimapur nung SCAD purtemi ayongzükba sentong ka nung Associate Director, Admission (SCAD) Ane Kevichusa aser Executive Director ( International Recruitment & Relation), Watsü Maken Imchen Payne nati iba college nung sayuba aser angazükba indang video ajanga sayua liasü. Iba kasa sentong nung tawa US nung SCAD tonga oagi repranger arurtem rongnung, Hope Academy, Dimapur nung Admistrator, Wt.Sashila Ozükümia lai anguba aser angatetba indang shisalemsatepa liasü.
Iba college nung züngner kaketshir aser parnok tsüraburtemi akevi-chu@scad.edu ajanga tongteprateptsü akoktsü.