SCERT Nagaland-i Mathematics Resource Book saya

Kohima, July 30 (TYO): State Council of Educational, Research and Training (SCERT) Nagaland-i Class VI, VII aser VIII atema Mathematics Resource Book on Teaching & Learning Materials (TLM) adokogo.
Mongulbarnü Additional Director of School Education, Limawapang Aier-i kaketji sayatsü.
SCERT indang Mathematics Cell-i ayongzükba anogo asemnü District Resource Group (DRG) sentong tenzükdang pai iba kaket sayatsüogo. Iba sentong ya Samagrah Shiksha Abhiyan, Nagaland-i teyari agüja agir.
“Tesayurtem ama asenoki inyakyim tasen angazüktsüla aser lanurtemi ongko pelapelaa angazüktsüsa sayutsüla. Iba kaket sayaba ajanga Nagaland nung kaketshirtemi jangrabangra ongko angazüktsü imlar” ta Limawapang-i o jembidang ashi.
Lanur kaketshir aikati ongko ya kanga dang tasak aser tebenja aser tekolok techiratemi angazüktsü ama bilemer, ta SCERT Nagaland, Director, T Sekhose-i ashi.
Ongko shitak mesayuba aser syllabus tai asüba agi kaketshirtemi tasak ama züngshir asütsü akok. Anungji tesayurtemi tanurtem dang ongko ya tezüpa ta angatetdaktsütsü merangtsüla, ta paisa ayongzük.
Kaketshirtemi meshi bilemba agiendaktsütsü atema asenoki ongko ya tasak masü saka jangratemtsüka ta angatetdaktsütsüla, ta Sekhose-isa shisem.