Scheme tasenba ajanga aluyimertem takum melenshitsü: Modi

New Delhi, January 13 (Agencies): Tanü Ato kilonser Narendra Modi-i, Crop Insurance Scheme tasenba ajanga aluyimertem takum jenjang nung temelenshi tulu alitsü imlar, ta ashi.

Iba scheme tasenba ajanga alima tzü mopung lendong atema teyari agütsüba den tan aliba mapatongtem nung mabensabatem atema-a teyari agütsütsü, ta pai ashi.

“Aluyimer adianu aser aianutsürtem, nenok Lohri, Pongal aser Bihu ama benjungtem amungdang sorkari Prime Minister’s Crop Insurance Scheme sempet agütsüogo,” ta pai twitter ajanga metetdaktsü.

“Iba anogo ya puti otsü anogo ka lir. Iba scheme nung ni temelung alemer, iba ya aluyimertem tajangzük nung ajemdaker yanglu. Iba ya ajanga aluyimertem takum jenjang nung temelenshi tulu adoktsü,” ta Modi-i shisem.

Ato kilonserisa, iba scheme nung tang aliba mapatongtem lir aser item mapatongtem nung mabensabatem densemtsü, ta ashi.

“Iba scheme ya ‘lowest premium’ lir, iba atema mobile phone ama technology mela-mela amshitettsü, teraksatsüba tekaraba nung asadangtettsü aser mapang telatet ka nung teyari lemshitsü lateta lir,” ta pai ashi.

Iba scheme nung tzümetsüng agi alu nung aonsotsü raksatsüba ama alima tzü mopung lendong atema teyari agütsütsü densema lir.

“Iba scheme agitsü aser tajangzük angutsü ya mela-melar. Anungji iba nung ya adentsüla,” ta pai aluyimertem dang ashi.