School 23 rongtokba atema Hurriyat aitsür

Srinagar, October 29 (Agencies): Taliban-i inyakba yimya nung tang Kashmir nung school tem tia atema Hurriyat Conference aser iba telok lenir, Syed Ali Shah Geelani nem tai tongloktsüogo.
Tesüiba hopta asem tsüngda tajemba agi school 23 rongtoktsüogo, aser ibaji ajanga tsüraburtem shisabulur, kechiyong ibaji tanurtem tarutsü tia den sentaktepa lir.
Tanü Srinagar nung tsürabur aika adenshia, tanurtem tarutsü tia raksatsüba atema Hurriyat  nem tai tonglokja longkak ait.
Parnokisa Kashimir nung iba tensa tekaraba nung anentsü takhangba agütsü.
Osangbenertem den jembidang longkak aitertem rongnung tsürabur kati, “School temji lapoktsüla. Geelani’er semchir jalabo tatidang agütsüogo. Kechiba parnoki onok chirtem tarutsü tia raksatsür?” ta asüngdanga ashi.
Ano tsürabur kati osangbener dang, “Tulur Geelani-i par kibong kümzüka ayur aser onok ama sensakertem anema inyaker. Ni kü taküm atema tsübur, iba yongji nü den jembitsü atema kü tejak nembanger,” ta ashi.
Parnokisa, telungpurtemi parnok tetuyubatem kangshia inyakdaktsür, ta ashi.
Taküm July 8 India sepaitemi Hizbul Mujahideen commander, Burhan Wani kahsetba sülen nungi tang tashi Kashmir nung tensa mesüngjemteti lir.
School temi timtem ajuruba atema Hurriyat aija Jammu & Kashmir Chief Minister, Mehbooba Mufti-ia, “Separatist temi school tanurtem ket nungi kakettem rakzüker lung agi melentsüner,” ta aitsüogo.