School assembly nung merükmejuba, plastic noktangba indang jembitsüla

Kohima, September 10 (TYO): Hopta shia khenbosa school assembly nung merükmejuba aser plastics amshiba ajanga timtem bentsür aruba indang osang jembitsüla ta Kohima Deputy Commissioner, Gregory Thejawelie-i tanü tebilemba ka lemsatep.
Government Middle School (GMS) Lower Chandmari ki tasen lapokba sentong nung jembidang DC Thejawelie-i “state sorkar telemtetba sülen anidaka, October 1, 2019 nungi Kohima district nunga single use plastic ajunga noktagtsü” ta ashi.
Pa ya District Mission Authority (DMA), Samagra Shiksha Kohima nunga Chairman lir.
Plastic amshiba ya temang anema alibaren aser alima atema tebilemtsü tulu ka kümogo, anungji iba osang ya nübor ajak sangdongtsü nüngdak, saka schools assembly nung lanur kakektshirtem nem-a metetdaktsütsüla, ta Thejawelie-i tebilemba ka lemsatep.
Kaketshirtem dang merükmejuba aser pei temang anepaluba indang tesayubatem-a shitak sayutsüla ta paisa shisem.
Paisa sorkar school tem nung proxy tesayur ayuba aser tesayurtemi mapa shitak meinyakba indang tebilemtsü atema jembidang “sorkar tesayurtemi pei teinyaktsü angatettsüla aser quality education agütsütsüba nung rangloker inyaktsüla” ta ashi.
Iba sentong nung SMC Lower Chandmari Secretary John Kath-i ki tasen yangluba indang osang lemsatepdang, DMA Kohima-i Sarva Shiksha Abhiyan kübok sen lakh 30 agütsüba agi kiji yanglu ta metetdaktsü.
Sentong nungsa Panchayat Lower Chandmari Chairman Nohokhul Sophie aser Lower Chandmari GB Hoshito Assumi nati tajungshi o tem jembi.