School Curriculum nung linük Emergency adentsüla: Naidu

Hyderabad, June 26 (Agencies): India nunger democracy putiotsü nung ‘Emergency’ mapang ya tamajungtiba liasü, anungji iba indang ya school curriculum nung shilem ka adentsü nüngdak, ta tanü Union minister, M Venkaiah Naidu-i ashi.
“Putu ka nung Emergency ya mapang tamajung ka liasü, aser tanü lanur aikati iba ya metetner. Iba tatalokba sülen küm 40 shi süiaka Emergency mapang ya mamatoktsüla,” ta Union Information & Broadcasting Minister, Naidu-i ashi.
Linük nung Emergency ataloker küm 42 ajungba nüngtem nung Telangana BJP unit-i ayongzükba sentong nung jembidang Union Minister, Naidu-i, “Asenok school curriculum nung Emergency indang chapter ka alitsüla, koba ajanga democracy tepsetba aser democracy asentenshiba indang lanurtemi metettsü. Iba ya kanga tongtibang, ta ni bilemer,” ta ashi.
Indian Council of Historical Research-i iba atemaji inyaktsüla, ta paisa shisem.
Tanü lanurtemi Linük Emergency indang metettsüla, kechiba emergency benok, iba ajanga kechisa atalok aser ibaji koma ser agien, itemji metettsüla, ta shia Naidu-i, “Iba sentong ya item tatalokba bilemtettsü atema lir. 1975 küm kechi atalok…Emergency ji kechi… kechi kuli ajanga Emergency benok, ibaji koda tim mesüi amshi, aser ibaji shiba ajanga, itemji lanurtemi metettsüla. India nung mapang tamajungtibaji Emergency liasü, aser ibaji mamatoktettsü,” ta ashi.
Paisa, Emergency mapang nung osangbenertemi junga meinyak, ta aitsü.
“Ramnath Goenka indang osangkaket, Indian Express, C R Irani indang Statesman aser Nikhil Chakrabarty indang Mainstream osangkakettem dak alaka osangkaket kechaia Emergency anema menokdak. Judiciary-i nüburtem atema kecha meinyak, tia makatsü kaji, tashitemetetertemi inyakba mapatemji taaktsüka liasü aser parnok aikati Emergency maitsütet,” ta paisa shisem.