School fee magütsüba atema tesayurtemi tanur ka dak azük

Hyderabad, Rongchii (April) 10 (Agencies): Hyderabad nung arishi küm 4 tain tanur ka dak school fee magütsüba atema tesayurtemi azük.
Tentonü (Hombar) tanubosangji kidangi arudang pa teberem aser tetsüng nung zübo keter aru aser ibaji par tsüraburtemi angu.
Pa ya Hyderabad kübok Meerpet nung aliba nija school- Krishnaveni Talent School nung azünger aser par tsüraburtemi pa indang fee magütsü lir. Iba jagi school ketdangsertemi tesayurtem dang par tsürabur nem fee ji agütsüdaktsütsü atema rongshi.
Iba tatalokba sülen tanubosanger tsüraburtemi police dangi oa ken o ka benok.
“Iba tatalokba atema FIR ka benokogo aser tesayur, principal aser director tem puogo. Parnok kobi melii okadaki anir oa ken o ka benoktsü. Onoki iba osang ya education department nem-a sangoktsüogo” ta Meerpet senior police officer A Manmohan-i osangbener dang ashi.
Par asem school Director T Gopal Reddy, Principal Padmaja Raj aser teayur Swaroopa nungertem Indian Penal Code aser Juvenile Justice Act kübok tai tonglokja lir.
Tanubosang indang teberem nung süng mesüra oset temerang kati azükba ama zübotem keta lir. Pa indang temola nunga yirutsüba zübotem keta lir.
Tanubosanger tsüraburtemji sensaker lir aser tebu Jala Sekhar Yadav ji plumber ka lir.
Tanubosangji Krishnaveni Talent School nung nursery kaketshir ka lir Swaroopa ta ser tesayur kati pa dak aiben azük. Pai fee magütsüi school-i aruba atema züka merenshi, ta police ketdangserisa shisem.
Tesayur jagi lai tanubosang dak azükba nangzükogo aser principal jagi tanubosang marazüktsü atema tetuyuba agütsü, ta child rights activist Achyutha Rao-ia osangbener dang ashi.
Iba tatalokba atema police tsüngdang FIR benokbaji Achyutha Rao’er non-profit Balala Hakkula Sangam ajanga ketdangsüa inyak.
School ketdangsertemi fee meshitsü rongshiba ajanga tesayur aser principal-i iba mapa inyak, ta Rao-isa metetdaktsü.
School director jagi tanubosanger tsüraburtem dang nungi fee meshitsü atema tetuyuba agütsü saka pa dak züka merenshitsü atemabo kecha mashi ta police dang ashi, ta Rao-isa shisem.