School lapokba timtem

Azüngtsü aser zülutsü memetetba purtem dang azüngtsü aser zülutsü sayua nüji kümdaktsütsü asoshi school lapoker. Iba jagi tangbo asenok ajaki zülutsü aser azüngtsü meteta lir. Tang ama asenoki zülutsü aser azüngtsü memetet asübo asenoka kechi komaka jenjang nung lila ta asenoki bilemdangtsübaji nüngdaker. Zülutsü metetba agi asenoki bilemba aser asen nüngdak zülur tangar nem züngdaktsütetter aser azüngtsü metetba agi tangar nungi shisa tasen aika angazüker. Aji oda, kaketreju (school) nung zülutsü aser azüngtsü sayu tenzükba nungi tenzüka ita anü petinu atena oa alima meimchirtemi shisa tasen nguteta kechisarina yanglutetter. Item ajakji school lapokba nungi tenzüker. Ajisüaka, tanü putu nung Nagaland nungbo school tasen lapokba aser school tejentem nung class teimba kümdakja temaba jenjangi tudaktsüba agi takoksa dang bena arur ta School Education ministeri yakanü Tesayurtem anogo nung jembidang metetdaktsübaji taoksatsüka saka shitak ataloka aruba angutsü. Akhidang, Nagaland nung school lapokbaji zünger mapa mangu kazürtem nem mapa inyakdaktsütsü asoshi lapokba masü saka mashi memetetertem shia kümdaktsütsü asoshi lapokba liasü. Anungji, school nung sayutsü shimba tesayurtemji Tsüngremi tenyaba mapa inyakertem amai liasü. Aji oda, akhidang tesayur mapa inyakertemji ita sen atema masü saka kecha memeteti aliba purtem nüji kümdaktsütsü temulungtetba aser tangatetba nung inyakertem liasü. Atangji, tanüa kasa tangatetba nung sen atema masü saka tanurtem ajak senso tajung kümdaktsütsü asoshi bendanga agüja sayur tesayurtem aika lir. Ajisüaka, tanü School Education ministerbai ashi amaji, ano tesayurtem aika tanur tajung kümdaktsütsü asoshi sayutsü tejangraba aser tangatetba mali tesayur mapa inyakertem lir. Itemjibo ita sen achitsü atema azünger. Amajok nung sorkar senpong nung nübortem sen yua aliba endokba mapatem rongnung ibaji ka asütsü. Aji oda, ita sen kija atema inyaker asünungji teinyakertema jangramatem inyaker aser tanurtem aika tajung kümnüseta taküm raksadaktsür. Tanü tesem aika nung sorkar school nung tazünger kata mali tesayurtem aika angati ita sen achir. Item school-temji meshibangdaktsütsü mechi school tanurtem tenüng tiyazü zülur agütsür. School nung azüngerbo mali saka nisung ishika tesayur mapai aitsü mechi nung sorkar school lapoker. School azüngerbo mali saka tesayur ishika shimtsü mechi sorkar school-tem class temaba jenjangi tudaktsür. School junga aotsü nükjidong nung sorkar office nungi masü saka yimtak mesüra mepu aser kiyong nung telidak pur yimten yimsüsürtemi reprangtsü atema Village/ Ward Education Committee shima toktsü saka parnokiang meyiper ita sen lemdanga agitsü asoshi tesayurtem nem sodi agütsüba osangtemji tezüdangtsü osangtem lir. Asenok ajaki pei chirnurtembo sen aika endoka private schooli yoktsü aser angati kaketshisatsü tajung ngua azüngtsü lapokba sorkar school nungbo temulung magütsür. Item ajak ya asenoki asadanga sorkar school-tem jungdaktsütsü asoshi ajungshitepa inyaktsü kanga nüngdaka kümogo. Atangji, tang tazünger maliba sorkar school-temji shibangtsüla saka meshibangtettsü, anungji shibangtsütsü bilemtsü melen Nagaland ajaklen sorkar school-tem ya tangang tasen lapoka tenzüker ama tenzükshitsü asoshi sentong tasen ka yanglutsü mapang tongogo. Tanü asüng sorkar school nung inyaktsü tesayur shimba lanurtem ya teimbaka kanga junga azüngba nisungtem angutsü. Anungji, parnok nemji parnok mapa angatetdakja ajungshitepra iba jagi parnok taküm nung temelenshi tulu adoktsü. Shiba südir süang, alima nung taküm alitsü mapang tatsüka dang lir, anungji iba mapang tatsüka nungji pei nem lemzüktsüba mapa jungjunga inyaktsübaji kanga tongtibang lir. Taküm arishi tatsüka nung tesayur mapa inyaktsü lemzüktsü saka mapai moi ita sen dang agizüka achitsü bilemra mesüra sayuyonga tanur shinga tajung mekümdaktsüra, alima nung amajok nung mapang endoka amonger asütsü. Alima nung jangratemtsü mapaji tesayur mapa, anungji tesayur mapa aser tenüng memenendaktsüi tesayur mapa nungbo ajaki ochishia alitsü aser nendaka inyaktsü merangtsüla.