School nung pei tetsü oshi sayutsü, Alternative English magitsü

Dimapur, May 11 (TYO) : 2018 küm nungibo Nagaland nung government aser private school ajak nung class 1 nungi pei tetsü oshi sayu tenzüktsü ta Nagaland School Education department sangdong ka ajanga metetdaktsüogo.
Tanur shia nem school nung pei tetsü oshi angazükdaktsütsü maongka agütsütsü, anungji primary aser elementary school lapoka alidak ajak nung pei tetsü oshi sayu tenzüktsü ta state government osang ajanga metetdaktsüogo.
Nagaland government ajanga school nung oshi asem angazükdaktsütsü sentong lateta aliba jenjang indang bushidangtsü atema luden ka shima inyakdaktsüba sülen, iba luden ajanga bushitetba nüngdaktem nung amendaker iba telemtetba ya agia liasü.
Iba luden ajanga bushitetba nung ashiba agi, linük nung school ajak nung oshi asem angazükdaktsütsü asoshi sentong liaka, Nagaland nungbo school aika nung pei tetsü oshi melen English-ang sayur aser class 8 tashi kaketshir ajak kangatepa Hindi agitsü lateta liaka, kaketshirtemi Hindi junga mangazüktetter.
Naga nunger kaketshirtemi pei tetsü oshi agitsü melen 90%-i Alternative English agir, ibayongji Naga nunger tanurtem teimbai pei tetsü oshi masü Nagamese mesüra English agidang jembiteper ta kasa ludeni bushitetba osang nung metetdakja lir.
Tang ya Nagaland nung class 8 alemer sayuba tetsü oshibo kin pezü dang lir, itemji Ao, Lotha, Sumi aser Tenyidie lir aser item rongnungjia kaketshisatsü agütsüba jenjangji liromedema mali ta kasa ludenisa metetdaktsü.
Anungji, Naga nunger kin tulu aser tila ajaki pei tetsü oshi nung kaketreju nung tanurtem nem züngdaktsütsü asoshi Nagaland University aser kin shi pei oshi renloktsü tenteta aliba Committee mesüra Board den yaritepa kakettem adoktsü aser ibaji SCERT aser NBSE ajanga repranga inyaktsü ta government-isa telemtetba agiogo.
Naga nunger kin shia tetsü oshi mesamadaktsüi renloka odaktsütsü atema state government-i Directorate of School Education kübok ‘ State Institute of Naga Languages’ ka tentettsü aser iba mapa ya tang teinyakdak offcers, language officers asere inyakertemi dang reprangtsü ta government-isa telemtetba agiogo.
School shia nung Naga nunger oshi sayutsü atema tesayurtem NCTE inyakyim nung shimtsü aser aser ‘State Institute of Naga Languages’ ajanga sayuyim renema magütsü dang Naga nunger kin shiai Ura Academy ajanga yanglua aliba curriculm aser syllabus amshitsüa akok ta kasa government sangdong ajangasa metetdaktsü.
Nagaland nung tetsü oshi aika asünungji, school nung sayutsüba oshiji English asütsü saka tanurtemi angatettsü atema tesayurtemi lesson tasaktembo pei tetsü oshi agi rasaa ashitsüla ta government-isa metetdaktsü.
Joko, 2018 küm nungibo class 1 nungi kaketshir ajak pei tetsü oshi agitsü asünungji, 2018 küm nungi class V nungi tenzüka tanem-tanemi tetsü oshi melen Alternative English agiba anenyonga aotsü aser Naga nunger masüba kaketshirtem dang “Naga Heritage ” indang sayutsü state government-isa tetuyuba agüja lir.
Hindi sayutsü asoshi tesayurtem shimdang government-i shimteta aliba institution nung züngtettertem dang agitsü aser Hindi class nung Hindi dang jembitsü aser tanga nunga Nagamese jembitsü melen Hindi dang jembitsü ajungshitsü ta School Education telemtetba ajangasa metetdaktsü.
Item telemtetba ya 2018 küm nungi shitak mapa küma inyaktsüsa School Educatiion department nung Principal Director-i anir Director, SCERT, NBSE, SMD, SSA/RMSA, DEOs, DDEOs, SDEOs, Principals, Headmasters aser school ajak nung tekolaktemi sentong yanglu tenzükang, ta School Education department nung Principal Secretary, Wb.F.P.Soloi metetdaktsüogo.