School nung staff kar nem prangpong amdaktsütsü melar

Miami, Metsüremi 10 (Agencies) : Parkland school nung taküm samartem kinüngertemi nungita tatartemi renemba ozüng ka (bill) Florida Governor Rick Scott-i meyongnem agüja agizükogo. Iba ozüng yagi nisung kar dang prangpong mayoktsü nokdanger aser school staff kar nembo prangpong amdaktsütsü atema lenmang lapoktsür.
Hopta asem shi atsütepa aruba sülen Florida tatartemi Rasemnü agizükba ozüng nungji Scott-i meyongnem agütsütsü asü masüar yashi tashi mejangjai liasü.
Tang renemba ozüng nungji prangpong alitsü atema nisung ka nem temelaba agütsüba tajemtiba arishi kümji 18 liasüba nungi metsür kati ajungketogo saka ibaji tashi tulu aliba National Rifle Association lobby group purtemibo kanga sashia anema nokdaka liasü. Ano kasa ozüng
jagi semi-automatic prangpong ka ‘fully automatic’ küma yanglushitsü memelar.
Coach Aaron Feis Parkland nung kasetba sülen temulunger atema “guardian program” densema enoksema lir.
Ibajibo kaketreju telung nung prangpong bener arua amakba nungi nokdaktsü atema yaritsü nükjidong nung ‘school employee’ kar nem prangpong amdaktsütsü temelaba agütsür. Iba sentong yabo staff-tem tongtibangsa coach aser school personnel atema dang lir aser sepai
mesüra ozüng amshiba maparen inyakdanga aliba tesayurtem nema iba maongka agütsütsü akok.
Governor Scott-i ashiba agi, paibo “guardian program” ya iba ozüng nungji enoksemtsü memulungi liasü saka ibaji temulungertem atema dang lir.
Semi-automatic prangpong tongtibangsa AR-15 assault rifle amala koba Nikolas Cruz-i nisung 17 kasetdang amshi, ibaji ayoktsü/alitsü atemabo ibaozüng yagi menokdanger.
“Prangpong kar nokdangba dang nungibo nisung kar dang kecha prangponga mayoktsü nokdangbajiang tongtibangba,” ta Scott-isa metetdaktsü.