School nung tanur ajakbo class temabai matutsü

Dimapur, Dec.18 (TYO) : 2016 küm Nagaland nung school ajak nung tatidang asemben alitsü aser item tatidangtem nung anguba marks ajakji benteperang class temabai atutsü asü matutsüar lemtettsü aser majung angurtembo kasa class nung mendaktsütsü  ta tanü School Education Directorate sangdong ka ajanga metetdaktsüogo.
Kasa sangdong nung ashiba agi, RTE Act 2009 nung lateta aliba ama 2016 küm school ajak nung Class 1 nungi 5 tashi nung anogo 200 bosa sayutsüla aser Class 6 nungi 8 tashi nung anogo 220 bosa sayutsüla.
Küm nung tatidang asemben agitsü alinungji, tesayurtemi küm piyong agitsü shimtteba lesson-temji shilem asem küma lemsatsüla aser shilem kaji tatidang ka atema asütsüla. Ibaji shitak inyaka otettsü atema hopta nung lesson 1-2 agitsüla aser tanurtem nem shilem agia inyakdaktsütsüla aser class test shitak agitsüla. Itemji atema ita nung Honibar mezüng aser tasembuba anogoji class tests / co-curricular activities/ life skills/ social works amala inyaktsüla ta School Education Directorate nungisa metetdaktsü.
Ano kasa sangdong nungsa, alima den tsüngkang medema tanurtem shisatsü aser tekolok arentsü atema school shia nung tanurtem nem parnok shi temang, tanüla taküm aser jakla yimya ajak shitak aientsüsa küm piyong sentong tajung yanglua anitettsüla ta tetuyuba agütsüogo.