School Nung Temelenshi

Nagaland tesem ajaklen Naga nunger tanurtem ajak züngtettsüsa government school lapoka lir saka item government school teimbaka nung tazünger mali küma aoba tia ya khen meyipa reprangdangtsü nüngdaker. Taküm küma joko yakta class 10 aser 12 pur tatidang agütsüba osang sangdongtsü aser temetet akhi ama government school-tem dang nungibo private school-tem nung azüngertemi tajungba takok angutsü. Ibaji temetet dang lir. Iba amaji küm aika arur asünungji, lia lia joko government school nung azüngertem dang masü saka tesayurtem dena meramaket küma odagi. Nisung mera aketba ya ita sen tulu achiba agi mesüra ki tajung nung aliba agi mesüra gari tajung nung senzüba agi masü saka pei mapa nung temulung agüja inyakba agi tangar tajung kümdaktsüba ajanga aketer. Tanü asen lima nung government school nung tazünger mali küma aodang aser tazüngertema junga anepalu mesütetba mapang ya state government-i süoki ia reprangdanger tapet temelenshi ka tangsa tang bener marutetra, government school ajak tiyazü aser taila kaketrejutem küma aotsü. Tanga tesem kar nungbo government school nung tazünger maliba agi shibangabo adok saka meshibang amai teayurtembo ayuba otsü angashir. Ano, government school aika nung tazünger kaketshirtem dang nungibo tesayur teimba aliba osanga angashir. Item ajakji government mali ama inyakba mapatem lir. Tazünger meliaka yangji ita sen chia inyakertem ishikabo lir, anungji tajangzük lir amai bilemer saka asenoksasa asenok akoksatsüsa inyakba mapa tamajungji aji ka asütsü. Government school-tem ya ita sen chia lidaktsütsü asoshi tesayur ishika den mapa inyakertem kar shimtsü atema lapokba masü saka tanurtem nem kaketshisatsü timi agüja takidak akaba nisungtem kümdaktsütsü nükjidong nung lapokba lir. Ajisüaka, tanübo Nagaland kümer küm 55 tsüngda school nung ita sen chia inyakertembo teimba aküm saka tazüngertembo ishinba akümer ta asüba tia nung government school-tem aika anenadoktsüba tia nung lir. Iba tebilemtsüji dang masü saka tesayurtem nema ita sen magütsütetba timtem agi government kangshiba angur. Iba amai school education department shirangba mapang ya yakta taneptsü mebushira ajungbena laoadoktsü aser tanurtem dang masü saka tesayurtem dena timtem takoksa ajurutsüsa adoktsü. Tanü government nung alirtemi aser ano talisa School Education department nung ketdangsertemi tang government school-tem nung ajuruba tebilemtsütem ya memenudangsa akoktsü asoshi shisabolua bilema inyaktsüla. Item tebilemtsü indang shisabolua bilemdangbo government school ajak ya private nem bendanga agütsüang tajungba asütsü ta bilemer. Atangji, private school süaka school nung azüngtsüba kaket ajak government-i dang shimtettsü aser school fee dena government-i ataktettsütsü. Ibaji dang masü saka school ka atema ali kobateka nüngdaker aser kechisa alitsüla, item ajakji government-i latettsütsü. Aji oda, school-bo private saka government tazüokba ka kübok alitsü. Iba inyakyim tasenba nung tang teinyakdak tesayur aser mapa inyakertem ajak pei mapa nungi anentsüba mapang matong tashi kasa government ita sen chia private school balala nung inyaka atatsü saka joko government-i tesayur tasenbo meshimtsü. Iba kasa inyakyim tasenba nung government school-tem meyong kiojen yangluba aser tanga nüngdak nung endoktsüba sen agi scholarship kümer sensaker tanurtem nem ita shia scholarship agütsütsü. Iba ama temelenshi tasen aser tajung ka yaktasa bener arua Nagaland school-tem meyanglushira, Naga nunger kaketshir tenüng nung senbo aika endoktsü saka tanurtembo tajung mekümdaktsütettsü. Iba khuret agi kanga shisabolua bilemba agi taoba hopta nung kasa tebilemmtsü onük ya asenoki “Koma Süla ?” ta asüba sabang nung lemsateptsü merangogo. Tanü yangi Nagaland kaketrejutem nung temelenshi tajung ka bener arudaktsünüba agi shisa tilaka lemsar. Atangji, iba yasa agitsüla ta masü saka iba yagi tazüngertem shisa tenük lapoka temelenshi tajung ka asoshi rongdak nüngdaksa bilema inyakdaktsüner.