School roll-call nung ‘Jai Hind’ ta langzütsü tuyuba Congress-i aitsür

Bhopal, September 13 (Agencies): Madhya Pradesh Education Minister Vijay Shah-i sorkar school tem nung anepdang roll call ajadang Yes Sir mesüra Present Sir melena Jai Hind ta ashitsü tetuyuba ka agütsü saka iba ya Madhya Pradesh Congress-i aitsüogo.
“Linük naklu ken mesüra linük ken atenba sülen mesüra morning assembly agiba sülen kaketshir ajaki Jai Hind yimyim ayimer. Ajisüaka, state sorkar tang tetuyuba agütsüba ajanga Independence nung shilem agirtem aser taküm bendanga agütsürtem mezüngmeshir” ta Congress otongdar KK Mishra-i ashi.
Mongulbarnü Satna nung Education Minister Vijay Shah-i October 1, 2017 nungibo district kübok sorkar school ajak nung kaketshirtemi roll call ajadang Jai Hind ta langzütsü ta osang metetdaktsü.
Shah-isa iba ya pilot project ka lir aser district ajak nung belenshia aotsü ta shisem.
“Satna district nung kaketshirtemi roll call ajadang Yes Sir mesüra Yes Ma’am ta mesüi Jai Hind ta langzütsü. Iba ajanga kaketshirtem dak linük meimba aser nüma atangba tangatetba agütsütsü” ta Vijay-isa metetdaktsü.
Jai Hind ta ashitsübaji sorkar school tem nungdang masü saka nija school tem nunga amshitsü, ajisüaka ibaji atema tetuyuba balaka agütsütsü, ta paisa shisem.
“Vijay Shah-i kechi jembirar memetet. Tawa tu education department-i state yimtiba nung Right to Education indang mungdang ka ayongzüka agi” ta Congress lennir Manak Aggarwal-isa ashi.
“Iba mungdang nung state ajungalen nungi ketdangsertem arua aden aser Shah menden sür agi. Mungdang lapokba sentong nung Shah-i Tir o jembidang Right to Education mungdang ta asüba amadoker, Right to Information indang ang jembi,” ta Aggarwal-isa shisem.
“Anungji, pai kechi jembirar memeteti jembir aser iba ya süoki ia mebilemtsüla” ta paisa metetdaktsü.