School tajungba akümtsü meranger

Nagaland nung government school teimbaka kanga mejungi kümadoker shia arutsüa tasak aliba mapang ka, tang School Education department-i school-temji shia arudaktsütsü meranga mapa kar inyakba angur. Item rongnungji school nung tanurtem dang sayutsü atema shimba tesayurtem aika school nung masü saka kar School Education Directorate nung, kar district office nung aser kar VIP-tem den külemi senzüa aliba tesayurtem ajak school-i meyipa yokba mapaji asütsü. Ano, iba denji school shia nung tesayur kwi alitsü tim, itemji repranga class takdang aser school tanurtem yari tesayurtem yoktsü sentong yangludagi. Tang yabo Kohima aser Dimapur nung balaka school aika nung school tanurtem dang nungibo tesayurtem teimba yoka lir. Iba jagi, tesayurtem aika sayunüaka subject agi matar. Ano külen, tsüket nung aliba yimtsüngtem nungbo class takdang dang nungibo tesayurtem ishinba yoka lir, kechiyong item tesemtem nungjibo tesayur inyaknür mali saka school tanurtembo item school-tem nungjisa teimba lir. Ano, Nagaland tesem kar nung school-bo mali saka tesayurtembo yoka lir ta ngura kecha tesüngmangtsü mali, kechiyong school-ji tanurtem dang kaketshisatsü sayutsü atema lapok ta asüba nükjidong to amadoker, nisung kar ita sen achitsü asoshi lapok ta dang angateta inyaker. Item jagi Nagaland tesem aika nung tanurtem dang masü saka tsüraburtem dena kanga akoksadagi. Item ajakji kodang jungjunga repranga inyakdir, Nagaland nung government school-tem ya mejungli asüyonga odang junga adoktsü. Government school ajungtsü atema tashitemetetter aika jaoka ajungshitsüa menüngdaker mesüra sen talila aika anguba agia majungtsü saka government ajungtsüla. Government nungji School Education minister lir, Secretary lir aser Director lir. Par asemi danga ochimulung agi Nagaland nung government school shia arudaktsütsü mulungtetra, küm ka tsüngda nung government school-tem jungadoktsü. Government kübok department tapu aika aliba rongnung School Eucation deparment yasa tongtibangtiba lir, kechiyong iba department yagibo nisung taküm ka yanglutsür. Aji oda, school nung sayuba ajanga nisung ka dak pei lima aser nübortem meima anepalutsüsa shisatsü tajung ka meinoktsütetra, School Education tamakokji aji asütsü aser iba tamakok jagi putu aika alima shirangdaktsütsü. Kong südir süaka, raksar aliba yanglushitsübaji nisung kati kenü mapa tilaka tajungba küma melenshiba nungi tenzüktsü aser iba temelenshi tilaka bener arutsür asütsübaji department nung inyaker tuluba nungi tilaba tashi agi kanga khuretsa bilemtsüla. Aji oda, temaba menden nung amenertemi pei ajangzüktsü mebilemi kenü school ajungtsü bilema inyaknung jungadoker alitsü. Iba kasaji tesayur kati khen school nung tanurtem dang temulung agüja sayu nunga school-ji jungadoker alitsü. Ano, government school-tem ajungtsü asoshi state government-i sentong tasen tasen atonga inyaktsüa akok. Item rongnung zünger mapa mangu aliba lanurtem bushia pei yimtsüng school nung sayudaktsütsü asoshi “Volunteer” shimtsüa akok. Atangji, ibaji angati masütsü, parnoka parnok mapa dak alang sen agütsütsü. Item Volunteer tesayurtem mapaji regular tesayurtem den yaritepa tanurtem dang tanü asüng lesson sayuyim nung sayutsübaji asütsü. Iba ama school nung khen atema sayutsü shimba volunteer shimba inyakyim jagi tanü asüng adhoc nung tesayurtem shimba maparen melenadoktsü aser kodang südir süaka tesayur mapa inyaktsü atemabo tatidang jungjunga agir külen dang shimtsü. Tanü Nagaland state government nung inyaker tulurtem yabo teimbaka Nagaland nung government school-tem nung azüngbatem lir. Ajisüaka, government school-tem nung züngtetba yimsüsür aser tulurtemi government school tajungba kümdaktsütsü mebilemba ajanga government school aika menendokogo. Itemji shia maru tashi Nagaland shia marutsü. Iba tangatetba nung tulur tilar aser takar sensaker ajak kasasa Education tajung angutsüsa government school-tem ya private school-tem den toktepa tajung kümdaktsütsüla.