School tem nung pei oshi züngdaktsütsü

Guwahati, February 8 (Agencies): Assam Finance minister, Himanta Biswa Sarma-i, school tem ajak nung state nung jembiba oshitem ajak züngdaktsütsü, aser Sanskrit tesayur aliba school tem nung Sanskrit compulsory süa sayudaktsütsü asoshi budget latetba mapang benokdangogo.
“Kaketshirtemi asen linük indang sobaliba metettsü kanga tongtibang. Linük indang otsütem timba Sanskrit nung zülua lir. Item otsütem melamela angazüktsü asoshi iba oshi angazükdaktsütsü nüngdaker, anungji school kong Sanskrit tesayur lir, item school tem nung iba oshi compulsory süa sayudaktsütsü asoshi ni benokdanger,” ta Sarma-isa metetdaktsü.
Sanskrit tesayur post tazüng alibatem yakta süngdaktsütsü, ta pai shisem.
Maneni pai state nung jembiba oshi balalatem samaa aoba indang jembidang yamai ashi, “Mapa balala angutsü asoshi International oshi balala angazükdaktsütsü meranger, saka bushisüngdangba ajanga ngutetba agi, tetsü oshi jangja metetba ajanga kaketshir kati tali tejangjaba angazükteter.”
Constitution, Eighth Schedule nung aliba ama public/private/government school tem nung class VIII tashi oshi kabo sa compulsory süa sayudaktsütsü asoshi pai benokdang.