School tesayur kati metsümeshiba atema Tripura sorkari ashishir

Agartala, November 15 (Agencies): Tripura nung school tesayur ka yimjak nung metsümeshidang apuba sülen sorkari pa nem show-cause notice ka agütsüogo.
Iba osang ya Langtarai Valley nung subdivisional magistrate nem sangoktsü.
School tesayurji Ram Kamal Chakma ta jangjaogo aser pa ya Ghagracherra High School nung inyaker. Pai school anasa yimjak nung metsümeshi aser anogo asemnü tsüngda telangzüba agüjang ta mapang latettsüogo.
November 12 nü kaketshirtemi Chakma ji joka anasa kima nung metsümeshidang tanurtemi angu, ta Inspector of schools, Paritosh Chandra Deb-i ashi.
“Tesayur kati iba ama taaktsü inyakyim inyakba ya tesempatsü aser loktii maginür. Anungji, Ram Kamal Chakma-i kechiba pa memerenshitsü ta ashitsü atema osang agütsütsü mapang latettsür” ta show-cause notice nung shia lir.
Tripura sorkari yimjak nung metsümeshiba aser jana endokba noktanga lir. Nisung kari kima nung jana enokba putetra, National Green Tribunal (NGT)-i tuyuba ama temerenshi agütsür.
Yimjak nung metsümeshi masütsü, jana meindoktsü atema osangtem prokshiaka Agartala nung iba khuret ya odang lir.
Agartala Municipal Corporation indang toilet tem nung osettem aser water pumps auyar ta asüba agi nikongtsütsü nungibo shibangadoker.