School yangkhu taret mebendaktsütsüla : SCPCR

Dimapur, October 18 (TYO) : State Commission for Protection of Child Rights (SCPCR) Nagaland-i school tem dang kaketshirtem school yangkhu taret mebendaktsütsü atema tetuyuba agütsü.
Anogoshia kaketshirtemi school yangkhu taret bener senzüba ajanga timtem aika ajurur ta tawa Associated Chambers of Commerce and Industry of India (ASSOCHAM)-i bushitetba osang ka metetdaktsüogo. School tem nung lockers agütsüba aser kakettem ajema bendaktsüba inyakyimtem liaka, iba khuret asoshi kanga junga bilemdanga inyaktsü nüngdak ta parnoki tebilemba shiogo, ta SCPCR Nagaland, Chairperson, Meilemla Pongener-i sangdong ka nung ashi.
Iba dak sendakba nung SCPCR Nagaland-i School Education Department dang Nagaland nung aliba school tem nung National Commission for Protection of Child Rights (NCPCR)-i teinyaktsütem tuyuba sülen anidaktsü atema asüngdangogo,
NCPCR-i tetuyuba agütsüba tem:
School yangkhuji tanur ka temang touzük nungi shilem 10 dang nungi talila masütsüla.
Pre-primary class tem nung tanurtem school-i books/notebooks bener maotsüla,
Iba onük atema Principals, Teachers aser Parents jenjang asem nung osang metetdaktsütsü aser prokshitsü aser iba atema short term awareness/training programmes agitsü.
School temi kaketshirtem dang timetable ama kakettem abentsü aser yangkhu timtem melii abentsü atema tesayubatem agütsütsü aser ano tesayurtemi kaketshirtem dang books/notebooks abentsü osang jelia metetdaktsütsü.
Item tetuyuba sülen manidakba school tem ozüng tapet agi merenshitsü.