School yangku makoker

Tanurtem schooli aodang parnok azüngtsüba kakettem parnoki makoktsüsa yangku nung oshir aoba angudang kanga meima repranger. School yangku asünungji iba yangku sünga kaket seper abentsübaji kenüp ananüp ka atema masü saka küm piyong iba yangkuji tapu ajak yaksüka alua abentsü. Ibayongji, takokerbo tanurtem den parnok yangku abentsü asoshi nisung yoker. Iba timtemji ngua tawa Bombay High Court-ibo Maharashtra sorkar dang tanurtem tazüngtsü kaket makok-makok bener schooli maotsüsa ita ka tsüngda sentong tajung yanglua inyaktsü asoshi obendang agüja lir. Takar aser tulur chirnurtem shirnok pei gari nung senzür, parnok atema school yangku aretbaji tebilemtsü tulukabo masü saka sensaker chirnurtem shirnok tetsüng agi ki o school na tsüngda anogo shia oli aruli jajar, parnok atemaji kanga timtem lir. Ano, Dimapur aser Tuli ama nungbo anü kanga tsüka apur asünungji, anüngdang anü tatsük nung school yangku makok-makok bener school tanurtem school nungi kidangi arua angudang asenok ajaki parnokji kanga meima repranga alitsü südi. Aji oda, item tila tanurtemji yamaji pei yangku makok bener anogo shia school o ki na tsüngda timtema senzübaji asenokia repranga dang meyutsüi parnok asoshi lenmang tajungba ka asütsüsa bilema lira school aser sorkar nung ketdangsertem den asenokia shisalemsateptsüla. Atangji, kaket aika azüngba aser lesson aika agibaji junger saka school tanurtem asoshi kaket aika azüngbaji tongtibangba masü saka parnok kolok aser shisatsü salatsütsüla. Aji oda, tanur kolok aser shisatsü salaja parnok tashitemetetter aser takidak akaba senso kümdakja sayutettsübajibo parnok nem kechisarina indang bilemdangdaktsütsüla. Tanübo asen lima nung lapoka akaba kaketrejutem nung sayuba yimyaji tanurtem nem akok tashi alima nung kechisarina indang bushiteta bener sarua enoktsür aser itemji parnoki mulungzüng agi akoker. Ajisüaka, tangar tashitemetetter lima nungbo school tanurtem nem dang kechisarina indang bushidaktsür. Aji oda, school-i aodangbo bendanger chanutemji school yangku tepongba abener saka kaketshisatsü bushitsü khuretjibo tuluba saka asen lima nungbo school tanurtemji school-i aodang yangku taret bener aor saka kaketshisatsü bushiba yimyajibo tepongbaba, kechiyong parnok sasa shisatsü tasen ka bushidaktsür masü saka kaket nung aliba dang züngdaktsür. School nung sayuba yimyaji kaket nung zülua aliba sayubaji dang asünungji asenok tanurtemi alima nung kechisarina tesüngmangtsütem indang ya kechiba aser koma ser (?) ta peisasa asüngdanga shisa tasen bushitsü mebilemer. Tangar tanurtemibo anüngdak petinutem ya komaser sangwar aser komaser metsüker, parnok tasazük kobateka aser petinutem nungji kechisa lir (?) ta bilemdanga shisa tasen bushir aser parnoki bushitetbajiang asenok azünger. Tangar o asenok na school nung tesayubaren nung tepilaji aji lir. Aji oda, kodaser mopong, tzü aser anü tashi amshia nisungtem nüngdak inyaktsütettsü ta school nung tanurtemi shisadangtsüsa parnok dang school nung sayur. Tanü alima nung asenok nüngdak asoshi yanglutetba kechisarina ajak ya tsüngrem arur yangluba masü saka teshisadangertemi yanglutetba mapatem lir. Tangaribo shisadanger saka asenokibo meshisadanger, tangaribo ya kechiba yamai ta shisadanger saka asenokbo tangari bushiteta yutsüba kakettemang  azünger, aser aji tuluka ama bilema asükümteper. Aji oda, Maharashtra nung ama okadak benoka mejembiyonga, Nagaland nunga School Education aser SCERT nung ketdangsertemi school tanurtemi makoktsüsa parnok school yangku bener anogo shia jajaba yabosa repranga temelenshi tajung ka bener arutsüla. Iba denji asenoka joko tangari zülua yutsüba lessontem kija akoktsü memerangi asenoksasa shisadanga ngutetba shisatsü agi nübortem nem tajangzük agütsütsüsa school nung tanurtem dang sayuyim melentsüla.