Schulz-i Britain Ato Kilonser tasenba, May aitsür

London, July 14 (Agencies): European Parliament lenisang, Martin Schulz-i Britain Ato Kilonser tasenba, Theresa May aitsüba olen ka tanü, Brehostibar nü sangoktsüogo.

“Britain lenila, May-i lar Cabinet yimsüsür tasentem  tim mesüi shimer aser lai yamaji inyakba ajanga lar Britain nüburtemi tarutsü anogotem nung timtem jenti ajurutsü,” ta shia, Schulz-i May aitsü.

May-i yashi, Bodbar nü Britain Ato Kilonser tasenba akümba sülen lar Britain linüki European Union (EU) toktsütsü maparen nung yariteptsü asoshi lar Cabinet yimsüsürtem shimtsü tenzüka lir.

Ajisüaka, Britain linük jenjang tajungba kümdaktsütsü nükjidong nung masü saka Britain nung tentetba yimtenren telok rong nung adokba mangatettepbaren bentsütsü nükjidong nung May-i lar Cabinet yimsüsürtem shimtsü tenzükogo ta Schulz-i metetdaktsü.

Meimlai aliba mapang ka nung May-i lar Foreign Secretary tasenba inyaktsü atema taoba London Mayor, Boris Johnson shim.

Brexit ta ajaba Britain-i EU toktsütsü telemtetba agiba maparen nung tongti shilem agir ka Johnson ya lir aser pai Brexit telemtetba agitsüsa tongti shilem agiba ajanga Britain maneni EU nung züngsemtsü pusemer Britain sensotem aser EU lenirtem aika jashidaktsüba kuli bushiteta lir.

Ano, Finance Minister inyaktsü atema toaba Foreign Secretary, Philip Hammond aser Home Secretary atema  Amber Rudd na shimba densema, May-i Brexit pusemer lenirtem lar Cabinet tasenba nung shimoksema lir.

“Taoba mapang inyakba ama, timtem toushi tia ajurudang Britain sorkar tasenba den amaliteptsü mulunga lir saka tan Cabinet yimsüsür tasen shimren reprangra, Britain linük jenjang tajungba  kümdaktsütsü nükjidong nung masü saka par linük nung tentetba yimtenren telok rong nung adokba mangatettepbaren bentettsü nükjidong nung ang May-i lar Cabinet yimsüsürtem shimba angur,” ta Schulz-i nenshia ashi.

Conservative yimtenren telok nungi yimsüsür, David Davis-i EU den tongteprateptsü minister menden benokogo aser pai ketdangsüa, Britain-i EU toktsütsü maparen inyaktsü.

Ajisüaka, Britain-i EU toktsütsü maparenji küm 2 shi agitsü akok ta mongitemi metetdaktsüogo.

Asür Margaret Thatcher sülen anidaka, May ya Britain Ato Kilonser menden abentsü maongka angur tetsür yimsüsür rong nung 2 buba lir.

“Britain ya teshimtetba nisung kar atema dang masü saka nübur ajunga indang taküm jenjang tajungba kümdaktsütsü asoshi inyakba linük ka kümdaktsütsü,” ta May-ia yashi Britain Ato Kilonser menden benokba sülen metetdakja liasü.