Science ajanga nübortem ajangzükdaktsütsüla : Dr Harsh Vardhan

April 19, 2016 nü NASTEC Kohima nung Union Minister, Dr. Harsh Vardhan nem Naga nunger sobaliba sübotsü aser nok sempet agüja tetushi agütsüba noksa nung angur.

Kohima, April 19 (TYO) : Temeten ka angutsü atema masü saka nübortem ajangzüktsü atema science ketdangsüa amshitsüla, ta Union Minister for Science & Earth Sciences, Dr Harsh Vardhan-i ashi.
“Science ajanga nübortem tajangzük ngudaktsütsüla” ta tanü Nagaland Science and Technology Council (NASTEC) nung Dr. Vardhan-i ashi.
Department of Biotechnology, DBT, Government of India-i teyari agüja Bangalore nungi Scientists den Chemical Ecology of North East Region Twinning Network Program tenzüktsüdang pai iba onük jembi.
Twinning Network Program on Chemical Ecology ya NER rejutem aser Bangalore nungi scientist tem tsüngda Chemical Ecology sentong ka lir.
Iba ya NER nung research agiba atema tongtipang sabang ka asütsü aser ano Bangalore nung rejutem den research & training tesentaktep yanglutsü.
Tanü Union Minister-isa Directorate of Science & Technology nung Nagaland State Referral Laboratory for Water Quality Testing & Monitoring lapoktsü.
Iba lab ya Department of Science and Technology, GoI aser NASTEC GoN under Water Technology Initiative Programme na külemi yaritepa tenzük aser NASTEC ajanga ketdang asür.
Dr. Vardhan-isa DBT MER – BPMC, GoI ajanga teyari agüja lapokba Institutional Biotechnology Hub semdang.
Sentong nung mendenji Secretary Department of S&T, Nikhashe Sema liasü, NASTEC Member Secretary, Dr. Zavei Hiese-i tesentepertem pela agizük aser Advisor DBT New Delhi, Dr T Madhan Mohan o Science & Technology Parliamentary Secretary, S Hukavi Zhimomi nati o tatsütsü jembi.
NASTEC nung sentong agiba sülen Union Minister-i Naga Hospital Authority Kohima nung DBT Healthcare Laboratory & Research Centre semdang aser idakji Paragonimiasis Research Laboratory tenzüktsü.
NHAK nung osangbener den sensaksemdang, Dr. Vardhan-i Nagaland state-i abenba onüktem ajak mapa küma inyaktsü merangtsü ta nangzük.
“Onok nenok den lir. Onoki Nagaland ya kechisarena ajaklen renlokdaktsünür. Taoba ghonda 25 tsüngda Nagaland nung nisung balalai kü den lemsatepba onük ajak atema mapa inyaktsü merangtsü” ta Dr. Vardhan-isa osangbener dang ashi.
Tanü NHAK semdangba sülen Dr. Vardhan-i Naga Model Village semdang aser iba sülen Dimapur Airport nungi tayimtsü ajanga pa New Delhi-i ao.