Scientist kati India nung mersü tashitiba tsünütet

Imphal, Aenjeti (January) 5 (Agencies): Manipur nung scientist kati linük nung mersü tashitiba adokdaktsütetogo. India nung mersü tashitem anguba northeast tesem nung pai iba hybrid chilli tsünütet.
Iba mersü ya pai capsicum frutescens cultivar, capsicum chinense cv, aser ana indang hybrid nungi adokdaktsütet.
Bhut Jolokia mesüra Manipur oshi nung U-morok ta ajaba mersü ya tang India nung mersü tashitiba lir aser iba ya 2007 küm Guinness World Records-i alima nung mersü tashitiba ya kuli agüja liasü.
“Ni 2007 nungi hybrid chilli tsünütsü tenzük” ta Manipur nung amenoka aliba Kwaklei and Khonggunmelei Orchids Pvt Ltd chief scientist Rajkumar Kishor-i osangbener dang ashi.
“Iba hybrid chilli ya yaküm Kochi nung Quality Evaluation Laboratory of Spices Board-i tendanga liasü” ta paisa ashi.
Iba mersü nem “Kishore’s fire ball” ta tenüng jaloktsüogo aser mersü tereprangtsüji Bhut Jolokia dang nungi tilaba lir.
Bhut Jolokia tsünüba ama masü saka iba mersü tasen ya anü alidak tsünütsü akok aser melamela shizüka maoer, ta Kishor-isa metetdaktsü.
2016 küm Kishor-i Manipur nung kanga sapua achiba Yongchak (bitter bean) indang metsüjang jungjunga anepaluteta liasü.