Scientist-temi Polio mesen amshia tekolok tumor aneptsütsü meranger

Washington, July 25 (Agencies): US kübok North Carolina nung tentetba Duke University nung inyakba scientist-temi polio mesen amshia nisung tekolok nung atemba cancer tashidak aneptsütsü merangtsü tenzükogo.
Parnoki polio mesenji amshia tekolok nung adokba tumour cell azüoka ita ishika tashi nung tumor-ji meshimeshia samadaktsütetba osang bushitetogo.
Dr. Matthias Gromeier-i küm 3 tejaklen nungi tenzüka iba tasa tasen ya tendanga amshitsü tenzük aser tanü tashi nung ‘Glioblastoma’ ta ajaba tekolok cancer tashidak agi shiranger nisung 20 rong nungi parnok 12 tashi aneptsüogo.
“Iba tasa tasen amshia aneptsüba cancer tashidak agi shirangertem indang teimla samar parnok joko asütsü renema liasü. Ajisüaka, tanübo, parnokji cancer tashidak agi meshirangdang ama kümogo,” ta Gromeier-i kanga pela ashi.
“Tan taneptsü agütsütetba ya sayatena ajanga inyaker ama lir. Ajisüaka, nisung ajakibo iba tasa tasen ajanga taneptsü mongutettsü kechiyong nisung shia indang tashidak nungi kümzüktsü tashi, immune system balala lir,” ta pai metetdaktsü.
“Polio mesen amshia immune system tali tashi itshitsüba ajanga nisung temang nung mima adoktsür,” ta shia, tan bushitetba tasa amshiba ajanga nisung temang nung adoktsüba mimi mapa inyakbaji tekolok wakdaktsüba, tashi meiti akümba, paralysis akümba, o junga mejembiteti akümba aser tekolak menüba ajanga jungai adoktsür ta pai rasa ashi.
“Yamaji timtem bener arutsüaka, cancer tashidak agi shiranger taküm lendongi meyoki parnok aneptsütsüsa tasa tajung ka ngutetogo ta tamang akar,” ta pai shisem.
Paisa ashiba agi, immunotherapy amshiba ajanga tarutsü mapang nung tumor aneptsütettsü.
Glioblastomas ya nisung tekolok nung atemba cancer tashidak rong nung kanga buloa atemba tashikdak lir aser kümshi alima ajunga nung nisung 240,000 shi dak iba tashidak atemba osang bushiteta lir.