SCO nung Ajit Doval-i kiralong-rartem anema inyaktsü mepishi

New Delhi, June 24 (Agencies): Bodhbarnü Shanghai Cooperation Organisation (SCO) senden nung India national security Advisor, Ajit Doval-i Pakistan nung amenoka aliba Lashkar-e-Taiba (LeT) aser Jaish-e-Mohammed (JeM) ama kiralongrar telok balala anema inyaktsü mepishi.

SCO NSAs senden nung pai, item ama kiralongratem anema inyaktsü atema SCO framework nung renema lir, ta metetdaktsü.

LeT aser JeM nati India nung, talisa union territory of Jammu & Kashmir nung kiralongra jenti inyakogo. Pakistan ISI-i yarisema JeM telok ya tentet, aser iba teloki Pulwama amakba mapang nunga CRPF sepai 40 tashi tepsetogo.

SCO senden nung Pakistan NSA, Moeed Yusuf-i dena liasü.

Senden nung India-i UN bangzüngtem shidak inyaktsü aser UN-i sangdongba kiralongrartem aser kiralongra teloktem anema inyaktsü nenshia metetdaktsü.

UN-i kiralongrartem, ta sangdongba telok timbaka Pakistan linük nung lir, ajisüaka Pakistan ketdangsertemi kiralongrartem anema meinyaker.

Tajik Capital Dushanbe nung ayongzükba SCO senden nung India NSA, Ajit Doval-i kiralongra tapu balala ajak sashia aitsüba den külemi arrtsü adener kiralongrartemji ochi obendangdaki anir arutsüla, ta metetdaktsü.

Senden nung Doval-isa Chahbahar, INSTC, Regional Air Corridors ama connectivity projects ajanga rongsenkettsüng tsütsü tajangzük anguba den külemi linük tsüngda tamang kateter, ajisüaka connectivity ajanga sorkar aser litsü akhümtsübutsüla, ta ashi.

China nunger infrastructure programme- China Pakistan Economic Corridor (CPEC) yagi Pakistan-occupied Kashmir (PoK) amshir, aser iba atema shisabulua India-i China dang iba project ashishiba aiben metetdaktsüogo.

SCO senden aliba mapang nungsa jurila senden ka nung Doval-i Russia NSA, Nikolai Patrushev den ghonda ana shi senden amendang linük ana dak sendakba onük aika nung o lemtepogo.