Scooty aser Dumper na tsüktepba lendong nung ka asü

Naharlagun, June 7 (Agencies): Tanep 4:30 shi nung Hatimatha, D Sector, Naharlagfun anasa NH-415 nung Scooty ka aser dumper ka ta tsüktepa nisung ka asü aser ka kanga mejungi yiru.
Iba lendong nung scooty nung mena alir anaprongla kanga mejungi yirua lendong atalokba tesem anasa aliba mozüki ka bushia anir ao. Yirusang ana ya Hage Taka’er jabaso Hage Nado aser Gyata Taka’er jabaso Gyati Talley ta jangjaogo. Hage Nado ya 4th IRBN nung ASI lir aser pa temang kanga mejungi yiruba ajanga 5:30 shi nung mozüki nung süadok. Gyati Talley ya Doimukh Police Station kübok Head Constable lir, pa temang kanga mejungi maneni mozüki nung anepaludar.
Osangbenertem den jembidang SP, Dr. A Koan-i ashiba agi, scooty aser dumper na tsüktepba lendong nung 4th IRBN nung SI Hage Nado aser HC Gyati Talley na kanga mejungi yirua liasü. Iba lendong atalokba sülen dumper anisangji jena oadok. Hage Gambo nungi osang angazükba sülen Naharlagun Police Station nung gari anisang anema ken o ka benokogo aser pa bushi tenzükogo.
Dr. Koan-isa ashiba agi, check post ajak nung garitem bushisüngdangba tali kümogo.
Gari lendong tali atalokba dak sendakba nung asüngdang dang pai ashiba agi, traffic ozüng nung ajaki anidaktsüla kechiyong iba ozüngji ajak kümzüka ayutsü asoshi lir. Gari anirtemi pei aser tanga asoshi bilemtsüla. Gari anidang yi jemer manitsüla mesera phone mamshitsüla. Tetsüng pezü aketba gari nung amenertemi set belt mapang ajak nung agitsüla aser tetsüng ana aketba gari anishirtemi helmet agitsü nüngdaker.