SCS ken o mebentettsüteti ASEM Summit tembangogo

Ulaanbaatar, July 16 (Agencies): Mongolia kübok Ulaanbaatar nung ayongba amenba 2016 Asia-Europe Meeting (ASEM) senden nung shilem agir Asia aser Europe lenirtemi South China Sea (SCS) ken o mebentettsüteti par senden tanü, Honibar nü tembanga menogo.
Philippines linüki SCS ken o bentettsütsü asoshi benokba ken o angadangba sülen United Nations Security Council (UNSC)-i China linüki SCS ajunga par meyong ta jembitsü temeten mali ta tan Mongolbar nü o bendang agütsü.
Ajisüaka, China-i par linük nem agütsüba o bendang magizüktsü lemtetba den külemi, tan senden nung SCS ken o mebenoktsü takhangba benokba ajanga ASEM nung shilem agirtemi SCS ken o ji mebentettsüsa akümba osang angazükogo.
Ajisüaka, Asia aser Europe lenirtem rong nung SCS ken o nung ajemdaker mangatettep adokba osanga jangjaogo.
Tan senden nung SCS ken o mebenok aka, tzüyimtem nung tensa azüoktsü, tetsükdakba kecha meli tzüyim lenmang nung senzütsü aser linük kati linük tanga ka amokmemerentsü telemtetba tan senden nung shilem agirtemi agia liasü.
Ano, linük balala rong nung adokba mangatettep ken o ajunga alima temzüng ozüng, United Nations charter aser UN Convention of the Law of the Sea (UNCLOS) ajanga bentettsü asoshi parnoki lemtetba osang alima dang sangoktsüogo.
China-i SCS shilem tulubaka par meyong ta züngshia, SCS nung par mitkar mapatong ishika inyaktsü tenzüka lir saka par linüki yamaji inyakba ajanga kidangsüa aliba Brunei, Malaysia, Taiwan, Vietnam aser Philippines linüktem jashidakja lir.