SCS nung mitkar terenemshitsü sentong agitsü: China

Beijing, October 26 (Agencies): China-i tan Brehostibar nü nungi tenzüka South China Sea (SCS) tzüyim nung par mitkar terenemshitsü sentong agitsü ta shia, bendang linüktemi ketdang asüba rongtem mitkar terenemshitsü sentong agiba tesemi marutsü tekümgdangtsü olen ka tanü, Bodbar nü sangoktsüogo.
China-i mangatettep adoka aliba SCS tzüyim nung mapang shia par mitkar terenemshitsü sentong agir aser par meyong ta züngshiba SCS tzüyim shilem ta züngshidak, Paracel Islands anasa aoba US Navy destroyer rong ka tesüsa, taoba hopta amokmerena meindokba sülen par mitkartemi tan terenemshitsü sentongji agitsü renemer lir.
China’er asetkong province, Hainan nungi Paracel Islands northwest tsütsü densemba tzüyim shilem nung par mitkar terenemshitsü sentongji agitsü renema lir saka iba tzüyim shilemji par kija meyong masü ta Vietnam aser Taiwan nati onük benoka, China den mangatettep ken o adoka lir.
China-i SCS kübok Paracel asetkong nung par mitkar tesep tulu tentetba den idakji surface-to-air missile system-a amenoka aliba osang ka US ketdangsertemi metetdaktsüogo.
SCS nung par tzüyim shilem densema lir ta temeten bushia, Brunei, Malaysia, Philippines, Taiwan aser Vietnam linüktemi kidangsüa aliba China linük den mangatettep ken o tulu benoka lir.