SC/ST Act atema SC-i Centre nem Notice agutsü

New Delhi, Rongjui/September 07 (Agencies): Tanü Supreme Court-i SC/ST (Prevention of Atrocities) Act yanglushiba onük anema temepishiba asem nung Centre dang nungi telangzüba meshi.
Justices- AK Sikri aser Ashok Bhushan nati akümba SC bench-i Centre dang nungi telangzüba meshi, ajisüaka yanglushiba ozüngji yamaji dang asütsü memelung.
Temepishiba onük agutsürtem dang bench-i, “Tanga tsütsülen nungi ken o mangadangibo onoki ozüngji tang aliba ama dang südaktsütsü makok,” ta ashi.
Kasa ken oji hopta trok sülen angadangtsü lemteta yuogo.
Tawa tzüngluruwa mongpu Parliament nung yanglushiba ozüng ajanga Supreme Court obendang ka agienja liasü aser ibaji anema lawyers Prathvi Raj Chauhan, Priya Sharma aser NGO nungeri temepishiba onük agutsü.
Temepishiba nungji, tang yangulsuhiba ozüngtemji fundamental rights anema lir, ta shia lir.
Temepishiba agutsürtem jagi temepishiba onük nung shia aliba agi, teloktep party temi rongshiba kuli, yimtenren nung tajangzük angutsü aser sangküm agitsü aliba Lok Sabha election nung rangloker sorkari iba ozüng yanglushitsü atema benok.
Parnokisa, sorkari Supreme Court obendangji agientsü atema mepishibaji tang tashi court nung anendaka lir.
Luroi/August 6, 2018 nü Lok Sabha-i Scheduled Castes and Scheduled Tribes (Prevention of Atrocities) Amendment Bill, 2018 agizüka liasü.