SC/ST Act onük nung Opposition-i Tir ajuru

New Delhi, Metsüremi 28 (Agencies): SC/ST (Prevention of Atrocities) Act kübok nisung apuba ozüngtem nung temelenshi benokba anema tanü opposition party balala nungi lenirtemi Tir, Ram Nath Kovind ajurua iba onük nung tiyongtsüi aita inyaktsü atema telemtetba agi.
Congress Party leniba nung opposition party balala nungi lenirtemi nikongdang Tir Kovind ajurua pa nem temepishiba shidi ka agütsüogo.
“India tesem ajaklen Dalits aser Adivasis anema kanga bulua inyakba mapang ka nung SC-i SC/ST Prevention of Atrocities Act kübok nisung apuba ozüng nung temelenshi benoker,” ta Rahul-i twitter ajanga metetdaktsü.
Rahul-isa, “Taonung nikongdang opposition party balala nungi lenirtemi Tir ajurua iba tebilemtsü onük lemsateptsü,” ta metetdakja liasü. Party balalai iba onük ashishia sorkar dang Supreme Court obendangji reprangshitsü atema akhanger.
Ano tanga osang ka nung, tanü MP temi Ato kilonser, Narendra Modi ajurua SC/ST atrocities act dak sendakba onük jembia liasü.
LJP tongti, Ram Vilas Paswan aser Union social justice minister, Thawarchand Gehlot na leniba nung NDA nungi SC aser ST MP temi Ato kilonser ajurua SC-ST atrocities act dak sendakba nung Supreme Court obendang lemsatepa liasü.
Senden tembangba sülen osangbenertem den jembidang Paswan-i, “Supreme Court-i SC/ST atrocities act dak sendakba obendang agutsüba onük nung Ato kilonser den shisa lemsatepogo. Modi-i onok tebilemba angadangogo,” ta metetdaktsü.