Sean Spicer mapa toktsüba ajanga Trump administration nung mangatettep adoker

Washington, July 22 (agencies): US tir atema taoba küm election nübuyimba mapang Donald Trump aser Russia tsüngta tesendaktep liasü, ta temolung melemi aliba ken o bushisüngdangba mapang ka nung White House indang Press Secretary, Sean Spice Hokulbarnü mapa nungi anen.
Wall Street financer, Anthony Scaramucci ya White House indang communications director inyaktsü, ta Trump-i sangdongba sülen Spicer-i mapa doktsü.
“@POTUS @realDonaldTrump aser iba jangratemtsü linük tenzüktsü asoshi maongka anguba atema kanga pelar,” ta Spicer-i Twitter nung zülutsü.
Spicer ya deputy press secretary, Sarah Huckabee Sanders-i melenzükogo.
Spicer-i mapa toktsüba amapang, “Kü indang administration ajanga mapa aika nung takok nguogo, saka item takok atema tenüngsang magütsü,” ta Trump-i media aitsü.
“Osang tajung ka ji, media temi mangatetaka nüburtemi angateter,” ta Trump-i shisem.
Spicer mapa toktsüba ajanga Trump administration nung mangatettep tali adokba sayur.
Attorney General Jeff Sessions-i tamalen kuli agütsüba ama masü saka Washington nung aliba Russia ambassador den election nübuyimba aser sentongtem indang jembishinü kaogo, ta itangiter temi bushitet, ta Washington Post ajanga Hokulbar aonung menur osang agütsü. Ken o bushisüngdangba nungi atsüngzüka oa Sessions-i pa ashioktsü, ta Trump-i ashir.
Russia den mangatettep adoka aliba atema Trump legal team indang coordinator, Mark Corallo-a mapa nungi anenogo, ta pasasa osangbener dang ashi.
Corallo aser Spicer-na prong-i mapa toktsüba asoshi kuli magütsü, saka Trump indang ken o tuluba akümba mapang dena prong-i mapa toktsü.
US tir atema election nübuyim mapang Trump aser Russia tsüngta tesendaktep meliasü, ta ita aika tekong meranga nokdakba sülen Donald Trump’er jabaso tambusang aser ketdangser ana densema Russia nunger lawyer ajuruba indang email aika temai adok.
Taoba küm US tir asoshi election agiba mapang Hillary Clinton indang otsü tamajung kaktettsütsü teimla nung Donald Trump’er jabaso tambusang aser ketdangsertemi Russia nunger lawyer ya ajuru, ta ashir.