Season atemdang Torres-i Atletico Madrid toktsütsü

Madrid, Rongchii 09 (Agencies): Season atemdang club toktsütsü ta Atletico Madrid nungi forward nung asayar Fernando Torres-i ashi.
Taoba mapang Liverpool aser Chelsea nungi football asayar arishi küm 34 tain, Torres ya küm tiyonglen Atletico Madrid nungi asayatsüba contract atemer.
Spain nunger Torres ya Amungnü La Liga nung Real Madrid den home nung 1-1 draw asüba mapang masayadaktsü.
“Iba club nung tang season ya ni atema tatembang asütsü. Nenokia ngua alitsü, ni aiben masayar,” ta Torres-i ashi.
Spain nungba ya loan nung AC Milan nungi asayaba sülen pa lanuwa indang club dangi 2014 nung arua aden. Atletico Madrid nungi asayaba mapang pai goal 126 agüja lir. Pa ya 2012 küm Chelsea-i Champions League akokba mapang iba club nungi tongti shilem agia asaya liasü.
“Ni yarirtem dang iba osang ashitsü ya tim amai bilem. Iba telemtetba ya kanga temela masü. Ibai maaksü anguba anogo masü. Tanaben salem ashitsü ya kanga tasak lir. Ni iba club nungi dang football asaya anennüa liasü. Ni maneni küm ana, asem mesüra pongu bo asayanür,” ta pai ashi.
Iba season nung home game tatembangba asaya Monupii (May) 20 nung Eibar den asayadang Torres tushia amshitsü aser ibaji kodanga mamatetba sentong ka asütsü, ta Atletico-ia ashi.
“Fernando ya ozü club nung mongin ka lir. Pa asoshi Atletico de Madrid indang kishi teti lapoka alitsü,” ta Atletico tir, Enrique Cerezo-i ashi.
“Pa tarutsü indang telemtetbaji pai agitettsü asoshi onoki teti shia liasü, kechiaser ibai par ki lir aser pai taruba season tanga tesem nungi asayatsü lemtetra, pai onok nem agütsüba asoshi pa dang pelatsüba dang lir,” ta Cerezo-isa ashi.