Secular teloktep nung Legislature Party Lenir Nitish Kumar shimogo

Patna, November 14 (Agencies): Bihar chief minister aser JD(U) lenir, Nitish Kumar den RJD tongti lenir, Lalu Prasad na leniba nung Secular teloktepi Bihar assembly election nung BJP-i aniba NDA madak takok tulu angu, aser iba teloktep nung legislature party lenir atema Honibar nü Kumar shimogo, koba ajanga pa tasembenbubaren state Chief minister inyaktsü maongka angur.
Tanü Bihar yimtiba Patna nung JD(U), RJD aser Congresss külem legislature party senden nung legislature party lenir asütsü atema RJD Parliamentary Board tongti, Rabri Devi-i arishi küm 64 Kumar tenüng benokba sülen Congress General Secretary, C P Joshi-ia pusema ibaji agizükogo.
Kiset shiruru chiyungtsü atema senotsü nung ochimashi ken o nung RJD tongti, Lalu Prasad aija aliba ajanga tan election nung pai metokteptet.
Tanü iba senden nung Kumar-i, “Vote agütsürtemi asenok dak tamang kaa shimogo, anungji asenoki meranga inyaktsüla,” ta ashi.
Tanü iba senden tembangba sülen JD(U) otongdar Neeraj Kumar-i, secular teloktep legislature party lenir Kumar shimogo ta metetdaktsü.
Neeraj-isa, iba senden nung Kumar, Lalu aser Sharad Yadav nungeri o tatsütsü jembidang tang tasenpur MLA tem dang, nüburtemi parnok nem khuret nungloktsüba angatetdakja meranga inyaktsü ayongzük, ta ashi.
JD(U) tongti, Sharad Yadav, aser JD(U) General Secretary K C Tyagi nungera liasü iba senden nung denogo.
Tanü secular teloktep senden metenzükdangyongi JD(U), RJD aser Congress senden balala mena liasü.
Congress party lenir shimtsü atema Congress MLA temi party Tir Sonia Gandhi aser tatong Tir Rahul Gandhi na nem tashi agütsü.
JDU-ia par legislature party lenir Kumar shim aser RJD legislature party lenir shimtsü atema Lalu nung nungloktsü, ajisüaka tanü tashi pai party legislature lenirji shima mali.