Security agency tem tashi itshitsü: Rajnath

New Delhi, January 19 (Agencies): Mongolbarnü Union Home Minister, Rajnath Singh-i, tang linük nung kiralongraba amokmeren tayongzükba jenti ajuruba tensa atema National Investigation Agency (NIA) ama security agency tem tashi taliba itshitsü, ta ashi.
Mongolbarnü NIA Raising Day sentong nung NIA ketdangsertem den jembidang Home minister Rajnath-i, “NIA ama tentet nem tashi taliba agütsütsü. Parnok mapa junga inyaktettsü atema parnok kanga tashi ita alitsüla,” ta ashi.
“Tanüasüng oset tasentem nüngdaker. Iba atemaji inyakdar aser NIA ano tashi aliba itshitsü,” ta pai ashi.
Paisa, 2009 küm NIA tentetba mapang nungi NIA-i kanga junga inyakdar aser ano parnok tashi taliba itshitsü atema sorkari parnok nem nüngdaka aliba tanüasüng oset tasentem agütsütsü,” ta Union minister-i ashi.
NIA ya 2009 küm January ita 19 nü tentet, aser iba tentet nükjidongji- kiralongraba anema raratsü atema bushisüngdangba tsü aser linük level nung security dak sentakba ken o balala atema inyaktsü.
Rajnath-isa, kiralongraba ya atak-atem ka lir aser iba ya alima linüktemi ajuruba tayongzükba ka lir. India-i alima den külemi kiralongraba anema raratsü, ta ashi.
“Kiralongraba ya alima linüktemi ajangshiba tayongzükba ka lir. Kiralongraba anema rarar linüktem India-ia pusemer,” ta pai shisem.
Kiralongraba aser security onüktem atema inyaktsü asoshi Jammu & Kashmir Angh, N.N. Vohra-i National Security Administrative Services tentettsü atema benokba asoshi Ranath-i pa nem tenüngsang agütsü.
“Angh-i benokba onükji ni pelaa agizüker aser iba onükji tapet sabang nung benoka jembitsü,” ta Rajnath-i ashi.
Jamm & Kashmir Angh Vohra-i, National Security Administrative Services tentettsü kanga nüngdak aser kiraongraba den security onüktem atema inyaktsü asoshi ministry balaka alitsüla ta benoka lir.