Security Forces-i Phek Hospital nung teyari agütsü

Dimapur, Mongputeni/October 22, 2021 (TYO): HQ IGAR (North) kübok Assam Rifles indang Phek Battalion-i Bodhbarnü (20.10.2021) District Hospital Phek nung mashisa alir tetsür ka nem teyari agüja liasü, ta sangdong ajanga metetdaktsü.

Tetsürla ya azü (O+ve blood) kanga nüngdaka liasü aser la azü den puteptsüsa lar kinunger shinga dak iba azü meliasü aser iba District Hospital nunga O+ve blood meliasü. Iba mapang Hospital nung inyakertemi kara kara dang Assam Rifles – Phek Battalion den osang-ola agitep aser idangjisa sepia ana (kasa O+ve blood alirtem) Hospital jagi yok aser tetsürla taküm kümzük.

Senti taküm ka kümzüktsü tangatetba aser temulungtetba tulu nung tsüngdong aruagi azü tenla agütsüba atema, tetsürla kinunger aser civil medical staff temi Assam Rifles dang pelaba metetdaktsüogo.

Brehostibarnü (21.10.2021), HQ IGAR (N) kübok Assam Rifles indang Jalukie Battalion-i Peren district nung tzünglu sashia aruba ajanga anentsüh alur aliba tesem nung nüburtem yaria liasü.

Tesüiba anogo ishika nungi, Peren District nung tzünglu maneni aruba ajanga tesem kar nung tzü agi metsüngbanga aser anentsüh alu liasü. Peren Town nung, lenmangtem anentsüh agi nokdangba dak alaka, iba jila nung anentsüh ajanga dokan 15 shi aser football ground kanga mejungi raksaja liasü.

Ajisüaka, iba lendong nung nisung taküm samaba mesüra yiruba osang kecha meliasü. Anentsüh aluba tesem nung dokan osettsüsettem tanga tesem kati belener aotsü asoshi Assam Rifles-i lanur aser dokan kibur tem nem teyari agütsü.

Nübur timtem nung aliba ajiteta teyari agütsüba asoshi, lisopurtem aser dokan kiburtemi Assam Rifles dang pelaba metetdaktsü aser tarutsü nunga maneni amalitepa inyaka aotsü asoshi parnoki Assam Rifles dang mepishia liasü.

Maneni, sangdong tanga ka ajanga angazükba agi, Brehostibarnü (21.10.2021) HQ IGAR (North) kübok Assam Rifles indang Ghaspani Battalion-i Medziphema Town nung security meet den youth & sports awareness campaign ayongzüka liasü.

Iba sentong shilem ama, mapa (employment)  maongka balala indang lanurtem dang metetdaktsü aser saispong sobaliba ajungkettsütsü nükjidong nung team-i saispong osettsüset balala lema agüja liasü.

Iba campaign nung GBs 13 aser lanur 45 agi shilem agiogo. Covid-19 dak sendakba mera ajak nung anidaka iba sentong agiogo aser iba meet den campaign ayongzükba atema sentong nung adenertemi Assam Rifles dang pelaba metetdaktsü.