Selena Gomez dang tour maotsü ajungshir

October 18, 2015: Arishi küm 23 tain, Selena Gomez dak küm asem tejaklen ‘immune system’ nung timtem aliba (Lupus) puteta liasü. La ya tang kensep tasenba ‘Revival’ ajungkettsü asoshi tour aotsü sentong lir, ajisüaka tetsü, Mandy-i aser tebu tanabuba Brian Teefey nati la manemba aria bilemja iba tour mejajatsü mepishiogo.
Osang ka ajanga ashiba agi, “La tour aotsü osang angashia lar tsüraburtem kanga shisabulur aser la dang khen bilemdangtsü shiogo. La temang agi makoktsü amai tenati bilemer.”
Ajisüaka ‘Same Old Love’ ken atenla parnoki ashiba kecha shishia mebilemer. Lar tsürabur ana ya la indang manager liasü saka lai April, 2014 nung anendakja liasü.
Kasa osang ajangasa, “La dak tejangraba balaka lir aser tang mapang ya shingaia la dang kecha mashitsüla,” ta Life & Style Weekly dang ashi.
Selena-i tawa ang la kanga junga lir ta shiogo saka la temang anepalutsü nüngdaker ta shisem.
Lai, “Iba timtem ya teti asoshi lir aser pei masa junga anepalura kecha balaka masü,” ta ashi.