‘Selfie elbow’ ya medical timtem ka kümogo

New York, July 06 (Agencies): Na ‘selfie’ tali agir ka süra nü dak “selfie elbow” timtem adoktsü akok, iba ya medical timtem ka kümogo, ta osang ka ajanga metetdaktsü.
Tennis elbow mesüra golfer’s elbow ama selfie tali agiba ajanga na noksa tangokba tekettsü nung tashitsü atua timtem adoktsü.
Award angur journalist aser NBC indang Today show ketdangser, Hoda Kotb tawa la tekkettsü nung tashitsü atua doctor dangi ao, ta elle.com osang ajanga metetdaktsü.
Kotb-i ashiba agi, ” Ni orthopaedist ka dangi ao aser pai kü dang, ‘na tennis asayar asü ping-pong (table tennis) asayar (?) ta asüngdang’. Ni pa dang ni selfies agir ta ashi.”
“Kodang nai noksa tangokdir nü teka mekanga atur, aser yimya balaka nung kileper noksa tangoker, nai kwiben agir’ar asadangtsüla 20 ben, 30, mesüra 40 agir. Selfie elbow ji ajak dak keta lir,” ta Kotb-isa ashi.
US nung aliba Hospital for Special Surgery nung sports medicine physician, Jordan Metzl-i, “Selfie kanga agiba ajanga nü dak selfie elbow adoktsü, kechiyong nai muscle kanga belemdaktsür aser teret nungi adokba muscle tesemji mesakdaktsür aser ibaji ajanga awaker,” ta ashi.
“Nisungtemi pei tekaji melentepa amshitsüla- khuretji lemsatsüla (teka anapronglai melentepa selfie agitsüla)” ta paisa ashi.
Games asayaba nungi tenzüka chat aser text sütepba, selfie tangokba aser tweet asüba ajanga taoba mapang tem dang nungi tang lanurtem dak kanga tali timtem adoker.