Seluophe yimtsüng nung mapang süyir aliba osettem apu

Dimapur, Tsüklai/Feb. 04 (TYO): Seluophe Youth Organization (SYO) aser Seluophe Students Union (SSU) lungjemer Seluophe yimtsüng nung February 03, 2020 nü ajungbena dokantem sema jaja aser iba mapang parnoki mapang süyir aliba chiyongtsü aser osettsüset tabu balala pua liasü.
SYO tir aser SSU tir nati osang ka sangdongba nung ashiba agi, yimtsüng telungzük nung mapang süyir aliba oset, yi aser temesepba chiyongtsütem ayokba atema tatok magütsütsü aser tapet temerenshi agütsütsü, anungji dokan kibur ajaki item yimya tamajung mamshitsü metetdaktsür aser nüburtem nungia amalitep akatsü imlar.
Sen 10,000 dak tali alang apuba oset tamajungtem ya lokti tentet balala nung ketdangsertem aser yimtsüng nung yimtsü-yimbo tem lia raksa indok, ta kasa sangdong ajangasa ashi.