Sempet Tajung Rongnung Ka

Kentenmenü aser kongki tapu balala temtetba ya sempet tajung rongnung ka asütsü. Kentenmenü nung asen Aor aser Naga nunger lanurtema aikati tangar menepa atongsema angudang mulung chia bilemer. Ajisüaka melung machiba kaji- lanur aika Tenla kidang pei sempet arangshitsü sabang angur, ajisüaka pei sempet junga arangshitetba sülenbo aikati osangtajung (gospel) ken atentsü aser mejema atentsü mejangrai secular ken atentsü dang jangrar. Anungji kententsü sempet tajung aliba lanurtem dak Arogoi tenük yoktsüla, aser item ama lanurtem dang pei sempetji Tsüngrem sentsüwangshi atema dang amshitsü asoshi ajungshitsüla. Tanübo asen state nungia India aser alimai meteta kentener telok balala aser kija kentener tajung aika adokogo. Mongintemi ashiba agi, kentenmenü ajanga meimchir tebilemba shisatsü nung dang masü saka libaliro aser temang rangben kongshir. Kentenmenü ajanga tanela asüngsashidaktsür aser shi nunga taneptsü angur ta 1990s mapang nungi mongintemi junga agizükteta tanübo hospital aser health centre balala nung Music therapist aser counselor tem ayur. Aji oda shi nung taneptsü bushia tangaleni anir aoertem tekaraba nung taneptsü angutsü asoshi kongki ola, asem atemba ola aser ken tanep densema ken tapu balala aika shiranger nem angadaktsütsü asoshi music therapists aser counselor tem tuyur. 2015 küm Kohima nung ‘World Autism Awareness Day’ amongdang Music therapy centre ka lapokba tu tatishitsu tajung rongnung ka asutsü. Item ya tetenzüker ser kentenmenü sempet ya maparen ka, nübur südoksünemdaktsüba mesüra shishilembaba asoshi dang masü saka shisatsü aser shi naprong nung shiranger nem taneptsü agütsütetba sempet tajung ka amai züngshia amshitsüla. Laishiba otsü nung reprangdangra Israel Chuba Saul tsüngdangi temenen tanela arudang Dawid-i kongki atemba ajanga Saul tesünep anguba asenoki angur. I Samuel 16:23 nung “Aser kodang temenen tanela Tsüngrem nungi Saul madak aru, Dawid-i kongki bena aru, aser pa ket agi atem, aser ibaji ajanga Saul süngzüka aküm aser junga liasü, aser temenen tanela pa dak nungi pila,” ta shia lir. Alima nung kin telemsa kecha tebendang makai ajaki ken meimer aser talisa asen otsüla-oboula nunger mapang nungi Tsüngremi asen kin nem kententsü sempet agüja lir ta asenok metet. Parnok mapang ken ajanga dang jembitepba asenoki otsü jembir. Anogo tepiyong parnok alu wadang nung nokdaker aonung kentena longso-longbena amongtsü parnoki jangraba aser amongba otsü asenoki angashir, aser item otsü ajanga asen tetsü-tebou mapang nungi asenok ya ken meimba kin ta kuli angur. Asenok aika dak kentenmenütsü sempet lir, anungji asenoki, talisa lanurtemi nükjidong tulu yur nendaka inyakra tang asenoki tongteta aliba dang nungi alia tongtettsü. Ken ajanga asen temang, tanela aser shisatsü ajak kongshir süra, aser Tsüngremi Aotsür-Aor Naga nunger nem iba sempet agüja lir süra aseni iba sempet ya tajungtiba nung amshidi. Asen nem agüja aliba sempet asenoki jangjadi aser ibaji tajungtiba nung arangshia Tsüngrem sentsüwangshi atema amshidi.