Sempettem – Rom 8: 28-39

Kechiyong tesüiba süshia, taküm süshia, kotak tenyartem süshia, yimsüsürtem süshia, tang alibatem süshia, tarutsü alibatem süshia, ain aketbatem süshia, tema nung aliba süshia, telung nung aliba süshia, tangar teyangluba oset süshia, asen Kibuba Khrista Yisu dak aliba Tsüngrem temeim nungi asenok piladaktsütsü makoktsü ta ni chichia amanger. Rom 8: 38-39.
Oh! Koda tejangja. Kechaia Tsüngrem temeim asenok nungi bener aotsü makok.
Asenok meketa tashi aikati asenok nungi aji bener aotsü meranger. Kaji asenoki pei sasa meimba. Asenoki Tsüngrem temeim dang nungi asen taküm, temang, asen mapa, asen temeten mesüra asen rongsen taoba züngshir. Asenoki kotak ajangzüktsü merangba dang nungi alima nükjitongang arishir.
Asen meketa Tsüngrem temeim den toktepba tashiji alima lir. Asenoki sen tali penputsü alimai atitanger, tangari tali metetta kümdaktsüner aser konang tali aginüba agi asenok atitanger. Aser Khrista nung Tsüngrem temeim asen meketa aliba den aritepdang tebilemdangba makar.
Satani item Tsüngrem matenba tashiji koda meimer! Pai akoktsüba lemang ajak aser temeten bushitsü aser temulung süa alitsü shisatsü agütsütsü mapang tajung teti bushir. Alimai inyakba ama inyaktsü teti ajungshir.
Saka aji tokjang. Tsüngremi ne taküm asoshi atsütepba nung dang ne den atener masü saka na asoshi rarar. Tatok agütsüba Pa temeimi ne taküm piyong, teti taküm tashi, na yaritsü. Pa dak aser Pa O nung amangang.
Ne tenüng asanger, Tsüngrem Yisu tenüng nung onok den teti dena liang. Amen.