Sen 15 alanga Patanjali noodles October 15 nü sayatsü: Baba Ramdev

New Delhi, October 11(Agencies): Nestle maggi meyokdaktsüba ondang nung iba maongka agia Baba Ramdev-i ajungkettsüba (promote) Patanjali Ayurveda-i tan hopta sen 15 alang noodles sayatsü sentong lir.
Iba noodles nung yimyim ‘Jhat pat pakao, aur befikr khao’ ta zülua aliba ashidang yoga guru-i iba noodles nung monosodium glutamate (MSG) aser lead malitsü, ta metetdaktsüogo.
Switzerland indang Nestle meyong Maggi noodles nung “two minutes” noodles ta zülua liasü aser iba chiyungtsü nung laletja aliba dang nungi tali lead densema yangluba aser “No MSG” ta zülua yur MSG enoka yangluba ajanga Food Safety & Standards Authority of India (FSSAI)-i mayoktsü shibangtsü.
Item tongutetba nung company-i Bombay High Court nung tesülen ashishia liasü anungji court-i tetendangba tasen kar agitsü tetuyuba agütsü. Nestle-i December ita nung maggi tanaben sayatsü sentong lir.
“Onoki Patanjali noodles October 15 nü sayatsü. Iba chiyungtsü ya tanga company ama maida nung atta shilem 10 enoker yangluba mesüka masü saka whole wheat flour (atta) kija agi yangluba lir,” ta Ramdev-i osangbenertem senden ka nung ashi.
“Tangari sen 25 agi ayok saka onokibo sen 15 agidang ayoktsü aser iba noodles nung aliba ‘taste-maker’ ji ‘health maker’ mesüka alitsü,” ta pai ashi.
Paisa, “Patanjali noodles nung rice-bran oil aser palm oil tajung amshitsü,” ta shisem.
“Onoki ‘swadesshi’ dak ajemdaker India nung adokba ajanga dang iba chiyutsü yanglu aser ibaji ajanga linük nüburtem temang nung teyari agütsütsü,” ta pai ashi.
Ramdev-i, ni FSSAI inyakyim maitsür aser parnoki onok indang chiyutsütem kodang tendangnüdir tendangtsü akok, ta ashi.