Sen 17,999 alangba ‘Honor 9i’ tanga linüktem nungbo sen tera tali agi ayoktsü

Panaji, October 06 (Agencies): Huawei indang sub-brand Honor-i camera pezü keta aliba aser bezel maliba “Honor 9i” smartphone India nung sen 17,999 agi saya, ajisüaka tanga linüktem nungbo iba jenjang India nung ayokba dang nungi timba agi ayoktsü, ta company nung executive tain kati shiogo.
“Huawei-i India nung Brihostibarnü sayaba Honor 9i smartphone bendanglenbo India dang nungi sen timba agi ayoktsü,” ta Huawei India-Consumer Business Group, sales nung Tatong Tir, P. Sanjeev-i iba phone alima rangben nung sayaba mapang osangbenertem dang ashi.
Iba smartphone nung tajungtiba kaji phone tesülen 16MP dual-lens camera flash dena aser tejaklen 13MP + 13MP camera set-up “selfie toning” flash dena alibatem lir.
“India nung smartphone sen 15,000 nungi sen 20,000 tsüngda tashi agi kanga aliteper. Ano smart phone amshirtem taginübatem kanga tali kümogo. Anungji customer temi aginüba tongtsütettsü asoshi onoki sen jenjang teyari atakteta ayur aser parnok upgrade süa lidaktsür,” ta Sanjeev-i ashi.
Aji oda süaka company-i ajanga iba smartphone linük koba nungsa sayatsü ano memetetdaktsü.
China nung handset yanglur tetsüti yagi taküm June aser July itatem nung alima rangben nung smartphone timtiba atonga yoktetba ajanga Cupertino nung amenoka aliba Apple ajateta tuogo.
China handset yanglur ya dang South Korea nung aliba Samsung sülen tanabuba jenjang nung lir, ta Counterpoint Research-i ‘Market Pulse for July 2017’ inyakyim ajanga nguteta lir.
Ajisüaka tanga China smartphone yanglurtem Xiaomi aser Lenovo ama parnoki linük telung nung retail stores melapokner.
Offline nung onok phone ayokba maparen kangsa junga odar, ta company ajanga metetdaktsüogo.
“Onoki senji service atema indoker. Onoki yimti 17 tashi nung ‘exclusive service centres’ lapoka lir aser item yimtem rongnung Delhi, Mumbai, Pune, Ahmedabad, Chennai aser Bengaluru yimtitema densema lir,” ta Sanjeev-i ashi.
“Smartphone atema shishilemba inyakyim tesadang kabo item yimtitem nungi lir,” ta pai shisem.
Küm shia smartphone noklang nung shilem 20 tashi bendanglen ayokba company, Huawei ya China nungi samartphone yanglurtem rongnung tekaratiba ainba company ka lir.