Sen 2000 mechi nisung ka asütsü merang

Hyderabad, November 29 (Agencies) : Mongulbarnü Andhra Pradesh nung aayangar ka sen 2000 tanük mongutetba mechi nung pasasa asütsü merang, ta par kinungertemi ashi.
Iba lendong ya Kurnool district kübok Nandikotkur tesem nung atalok.
Murtuza Vali-i taoba anogo pezünü tashi sen 2000 tanük manguba ajanga kidang tongtibangsüa nüngdakba osettem malitetba agi tejashi marem tasütsü mulungteter miim mozü ajem.
Par kinungertemi ashiba agi, mapa kiburi Murtuza nem pa taa agütsüdang senpak 2000 tasenba agütsü. Iba sülen bener pa dokan balalai oa lijalirongtsü merang, ajisüaka tanük mongtetba agi tejashikang nung miim mozü (pesticides) ajem.
Murtuza kinungtsü den tanur ana prong sentepa tebuji jila nung aliba Community Health Centre-i anir ao. Iba sülen pa Kurnool nung aliba sorkar Hospital-i anir ao.
Linük nung sen nokdangba sülen iba tesem nung lendong joko tanabenbuba ataloker.
Sorkar mapa nungi anisüngzüker aliba tambur, arishi küm 62 tain ka Hokolbarnü State Bank of India ka nung sen agizüktsü atadang temulungjang mapa meinyaki akümba ajanga ashi.
Iba tambusangji sen agizüktsü asoshi gondha ana tashi nokdaker ata lia aoksaa laoa asü.