Sen 500 & 1000 note agientsüla : Naidu

Amaravati, October 12 (Agencies) : Yimtenren mapa ya ochimashirtem tejenokdak ama kümogo, anungji linük nung ‘black money’ azüoktsü atema sen 1000 aser sen 500 note agientsüla, ta Andhra Pradesh Chief Minister, N Chandrababu Naidu-i takhangba agütsü.
“Yimten mapa ya ochi mashirtem aser black money aazükertem tejenokdak ka ama kümogo. Yimten mapa nung inyaker kari tim mesüi inyaksangshir. Ni tanü Prime Minister dangi shidi ka nung sen 1000 aser sen 500 note agientsü aser bank ajanga dang sen amshitsü atema takhangba agütsür” ta Naidu-i osangbener dang ashi.
Sen 1000 aser 500 note tem agienba ajanga vote alizükba inyakyim anentsü. Asenoki bank accounts amshitsüla aser iba yimyaji sübatsüla. Iba inyakyim ajanga ozüng alema mapa inyakbatem azüoktettsü, ta paisa ashi.
“Tanü asenoki smartphone ka ajanga kechisarena ajak inyakteter. Smartphone ajanga shishilembatsü, senzüsenbongtsü, sen belentepba mesüra bendanglen sen amshitsü akoker” ta Naidu-isa shisem.