Sen aiben agizükba nokdangtsü atema maidoktetba shiai nüloktsütsü

New Delhi, November 15 (Agencies) : Nüburtem nem bank nungi sen agizüktsü atakteta yutsüba dang nungi talila agizükba nokdangtsü atema sorkari election nung amai maidoktetba shiai amshitsü ta Mongulbarnü sangdongogo.
Economic Affairs Secretary Shaktikanta Das-i osangbenertem dang ashiba agi, Ato Kilonser Narendra Modi-i Finance Ministry aser Reserve Bank of India (RBI) nunger den tejenba sen nokdangba sülen tang tashi kechiba bank tem nung nüburtem tarensen talanglang alir ta asadanga tanabuba senden ka menogo.
“Tesem aika nung nisung kasai sen agizüka jajar. Parnoki bank ka nungi kati aoer aser yamaji inyakba ajanga tanüngba nüburtem sen agi matatsüsa akümer,” ta Das-i ashi.
“Iba inyakyimji nokdangtsü atema sen agütsüba counter tem nung election nung amai maidoktetba shiai amshitsü. Nisung kari ochi mashi sen melentsü atema anogo ka nung bank balala aiben semdanger. Anungji maidoktetba shiai amshitsü atema bank tem nem tesayuba agütsütsü aser Mongulbarnü nungi iba maparenji tongtibang yimtitem ajak nung tenzüka amshitsü,” ta pai shisem.
Iba den külemi, nüburtemi anogo nung latetja aliba ama ATM tem nungi sen 2,500 agizüktettsü aser bank counter tem nungi tejenba sen 4,500 melentettsü. Iba dakji alaka bank account ajanga hopta nung timba agi sen 24,000 agizüktettsü.
Jan-Dhan account amshirtemi khen nung timba agi sen 50,000 inoka yutettsü, ta sorkari lemtetba Das-i metetdaktsü.
“Nisung karibo black money inoka ayutsü atema Jan-Dhan account amshir. Anungji iba account amshirtemi khen nung timba agi sen 50,000 inoktettsü,” ta pai osangbenertem dang ashi.
Das-i, shitakba Jan-Dhan account alirtem nem timtem kecha magütsütsü ajisüaka sen 50,000 dak tema inokbatemjibo kong nungi arurar kanga junga mita kuli bushitsü, ta ashi.
“Jan-Dhan account nung sen inokbatem kanga junga mitdar. Jan-Dhan account amshirtemi tangar meyong ochimashi sen pei account nung inoka melendaktsütsü memelatsüla,” ta pai shisem
Tanga account tem atema Finance Minister Arun Jaitley-i sen lakh 1.5 nungi lakh 2 tashi inokba bushisüngdangtsü atema ketdangsertemi menungnangtsü, ta mezüng yongi metetdaktsüogo.
“Sen melenba atema telok kari longkak aiter ta Social media tem nung olulu prokba amanga malitsüla. Longkak aitba noksa ji zoom sür reprangdangra 2015 küm indang noksatem lir,” ta Das-i ashi.
Iba asadangba senden nung ‘technology teams’ tentettsü lemtetogo aser ibaji ajanga e-wallets amshiyim tali ajungketa tang adokba senpak tasentem ATM tem nungi agizüktettsü atema kol yanglushia renemshiba mapang nüburtem ajangzüktsü.
Jaitley-i tan hopta tetenzüklen ATM tem renemshitsü atema hopta ana mesüra asem shi agitsü ta shiogo. India nung aliba ATM tem ajak tang adokba sen 500 aser 2000 tasenba senpaktem agizüktettsüsa yanglushitsü nüngdak ta ashi.
Bank aser post office tem nung sen peria lir anungji shisa bulutsü nüngdak madoker, ta Das-i ashi.