Sen anentsüba ajanga India GDP shilem 2 ajemtsü: Manmohan

New Delhi, November 24 (Agencies): Sorkari sen tamshidak anentsüba ya aibelena inyakba ka lir ta shia tanü taoba Ato kilonser, Manmohan Singh-i, iba telemtetba ya ajanga linük GDP shilem 2 ajema akumtsü, ta metetdaktsü.
Iba onük nung Rajya Sabha nung o toktepdang taoba mapang Finance Minister aser Reserve Bank of India (RBI) Governor inyaka alisang, Manmohan-i, “Tang inyakba mapa ya ajanga linük income, linük GDP (gross domestic product) shilem 2 ajema akumtsüa akok. Iba ya tali alia asadangtetba masü saka ajema asadangtetba lir,” ta ashi.
“Tang inyaka aliba mapa ajangasa nüburtemi sen inyakyim aser bank inyakyim nung tamang samatsü aser tashi meiti akumtsü,” ta ashi.
Tanü Rajya Sabha senden nung Manmohan-i minute 7 shi jembidang Ato kilonser, Narendra Modi aser Finance Minister, Arun Jaitley nati kanga nendaka angaa liasü.
“Anogoshia bank inyakyim nung ozüng tasentem benokbaji majung. Iba ya ajanga Prime Minister’s Office, Finance Minister’s Office aser Reserve Bank of India noksa mejungi aliba sayur,” ta UPA sorkar mapang Ato kilonserisa ashi.
Yaküm December 31 nü tashi nung India rongsenkettsüng shilem 7.2 ina liasü aser küm ka piyong nung shilem 7 liasü.
Linük nung economist tem, mongintem aser think tanks-i India rongsenkettsüng jenjang alutsü ta asadangteter aliba mapang ka nung Manmohan Singh-ia GDP ajema akumtsü indang metetdaktsür.
Singh-isa, sen 500 aser 1,000 notes anentsü atema Ato kilonser, Modi-i tuyuba ajanga tilateri shishilembartem, sensakertem aser yimtsüngtem rongsenkettsüng nung timtem koma ajangshir’ar sorkaria asadangdar ma? ta asüngdang.
Singh-i Ato kilonser Modi dang, “Nüburtemi bank nung sen deposit asür saka parnok sen magizükdaktsüba linük kar danga Ato kilonseri shitettsü asü?” ta asüngdang.