Sen anentsüba ajanga timtem ajak anentsü: PM Modi

Muzaffarnagar, December 03 (Agencies): Honibarnü Ato kilonser, Narendra Modi-i, sen tamshidak anentsüba ajanga nisung aikati timtem ajangshidar saka nüburtemi aremzükba atema pelar, ta ashi.
Modi-isa, sensaker indang Jan Dhan accounts nung black money deposit asürtem nem temerenshi agutsütsü, ta ashi.
“Sen anentsüba mapatong ya ajanga India nung sensak tia, ochimashi aser black money densema timtem ajak anentsü,” ta Ato kilonseri ashi.
Tanü Uttar Pradesh, Moradabad district nung Bharatiya Janata Party nüboyim sentong nung jembidang pai, iba tesem nung aliba nüburtemi 2014 Lok Sabha election nung BJP yariba atema pelar, ta metetdaktsü.
“MP ka akumtsü atema dang ni Uttar Pradesh nungi toktep masü, saka iba ama state tulu ka nungi tenzüka sensak tia anema raratsü atema toktep,” ta Modi-i ashi.
Sen tamshidak anentsüba dak sentakba nung pai, “Tangbo nenoki timtem ajurutsü, saka tensa tajungba kümdar. Ni linük nüburtem dang pelar,” ta ashi.
Sensakertem indang Jhan Dhan accounts nung black money deposit asürtem dang Modi-i, “Black money rizünga alirtemi sensakertem teyari meshia parnok kishizüng nung nokdaker. Takartemi sensakertem temopu nung kongshiba nenoki ngudanger asü. Sensakertem indang Jhan Dhan accounts nung black money deposit asürtem tepuokdak ayutsü atema ni lenmang bushidar,” ta ashi.
“Nov. 8 nü telemtetba ajanga black money rizüngertem kodamesüi kümogo. Ochimashirtemi bank-i mouteter, ibayongji parnoki sensakertem kishizüng nung nokdaker,” ta paisa ashi.
“Iba linük ya ochimashi agi rajang kümdaktsür masü no? Asenoki ochimashi ya tera nungi atsüdoktsüla masü no? Ochimashi ya pasasa oadoktsü asü?” ta pai asüngdang.
India renloknüra state tulu nungi tenzüka ochimashi anentsütsüla, ta pai ashi.
“Linük nung sensak tia agientsü atema asenoki Uttar Pradesh, Bihar, Maharashtra, West Bengal ama state tulutem nungi tenzüka ochimashi tera nungi atsüdoktsüla,” ta paisa shisem.